ខេត្តបន្ទាយមានជ័យ៖ លោកឧត្តមសេនីយ៍ទោ អ៊ុងស៊ីផាន ប្រធានពន្ធនាគារខេត្តបន្ទាយមានជ័យដែលល្បីល្បាញថា ជាមន្រ្តីជាន់ខ្ពស់ដែលតែងល្បីមានរឿងអាស្រូវជាញឹកញាប់ ប៉ុន្តែគេមិនដឹងថា តើឥទ្ធិពលអ្វីទើបធ្វើអោយលោកផ្កាយ២រូបនេះនៅតែមានវាសនាខ្ពស់ត្រដែតដដែល បើទោះជាមានពាក្យបណ្តឹងជាច្រើនលើកច្រើនសារពីរសំណាក់មន្រ្តីក្រោមឳវាទ ពាក់ព័ន្ធនឹងភាពមិនប្រក្រតីក្នុងការគ្រប់គ្រងពន្ធនាគារ។
គួររំលឹកផងដែរថា រយៈពេលជិត១ឆ្នាំទៅហើយ ដែលមន្ត្រីពន្ធនាគារខេត្តបន្ទាយមានជ័យចំនួន២១នាក់ បានផ្តិតមេដៃ ប្តឹងមេកើយខ្លួនឯង សូមគោរពជូន សម្តេច ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បើគិតពីថ្ងៃទី២ ខែមករា ឆ្នាំ២០២១ ប៉ុន្តែទោះជាមានក្រុមអធិការកិច្ចចុះស៊ើបអង្កេតយ៉ាងណាក៏មិនដែលទទួលបានលទ្ធផលជាផ្លែផ្កាអ្វីឡើយ ក្រៅពីជួបជុំគ្នាហូបបាយតែប៉ុណ្ណោះ។
សូមបញ្ជាក់ថា ក្នុងកម្មវត្ថុពាក្យបណ្តឹង មន្ត្រីពន្ធនាគារខេត្តបន្ទាយមានជ័យ បានសុំប្តឹង ឈ្មោះ អ៊ុង ស៊ីផាន ប្រធានពន្ធនាគារ ខេត្តបន្ទាយមានជ័យ ពីបទជេរប្រមាថ ធ្ងន់ធ្ងរ និងគ្មាន ក្រមសីលធម៌ និងវិជ្ជាជីវៈជាថ្នាក់ដឹកនាំ។ក្នុងលិខិតនោះដែរបានបញ្ជាក់ថា តបតាមកម្មវត្ថុខាងលើយើងខ្ញុំសូមគោរពជូនសម្តេច មេត្តាជ្រាបថា៖ រយៈកាលកន្លងមកលោក អ៊ុង ស៊ីផាន បានប្រព្រឹត្តកំហុសជាច្រើន ដូចខាងក្រោម៖
១.គ្មានក្រមសីលធម៌ និងវិជ្ជាជីវៈ ជេរប្រមាថថ្នាក់ដឹកនាំ និងមន្ត្រី
២.យកគ្រួសារមកនៅកន្លែងធ្វើការ និងចិញ្ចឹមសត្វឆ្កែជាច្រើនក្បាលបង្កភាពកខ្វក់ និងពេលខ្លះបង្កគ្រោះថ្នាក់(ខាំមន្ត្រីឱ្យរបួស)ហើយមន្ត្រីវាយការពារខ្លះក៏មិនបាន ។
៣.ប្រជុំហាមមន្ត្រីតាមការិយាល័យមិនឱ្យគោរពតាមការណែនាំរបស់អនុប្រធានពន្ធនាគារទទួលផែន
៤.បក្ខពួកនិយម គៀបសង្កត់មន្ត្រីមិនឲ្យមានការតវ៉ាផ្សេងៗ ពុករលួយ ដូចជាថវិកាធ្វើកំផែង៣៥០ ម៉ែត្រ លោក អ៊ុងស៊ីផានធ្វើបានតែ២០ទៅ៣០ម៉ែត្រទុកចោល។
៥.បំបែកបំបាក់ការសាមគ្គីភាពផ្ទៃក្នុង អាងអំណាចមិនឱ្យមន្រ្តីគោរពអ្នកណាក្រៅពីខ្លួន ។
អាស្រ័យហេតុនេះ សូម សម្តេច ក្រឡាហោម មេត្តាជួយរកយុត្តិធម៌ដល់ពួកយើងខ្ញុំផង។ សូម សម្តេចក្រឡាហោម មេត្តាទទួលនូវការគោរពដ៏ខ្ពង់ខ្ពស់អំពីយើងខ្ញុំ ។
ក្រៅពីពាក្យបណ្តឹងនេះនៅមានការបែកធ្លាយប្រធានពន្ធនាគារខេត្តបន្ទាយមានជ័យលោក អ៊ុង ស៊ីផាន ត្រូវបានកូនចៅប្តឹង ខណះដែលផ្ទុះរឿងអាស្រូវពុករលួយហើយនឹងប្រើអំណាច ថ្នាក់លើកៀបសង្កត់ មកលើកូនចៅ រហូតត្រូវបានកូនចៅប្តឹងទៅសម្តេចក្រឡាហោម ស ខេង
១-រឿងស្នើសុំលុយរដ្ឋ(៩៤លាន) ដើម្បីយកមកធ្វើកំផែងតែធ្វើបានតែ ៣០% ទេ។
២-រឿងស្នើសុំលុយរដ្ឋ(៩៤លាន) ដើម្បីយកមកជួសជុលអាគារ ដោយឡែកមិនទាន់ឃើញមានជួសជុលទេ។
៣-រឿងគំរាមមន្ត្រីក្រោមឱវាទ ដោយប្រើអំណាចជាថ្នាក់លើគាបសង្កត់ថ្នាក់ក្រោម រឿងដែលពួកគាត់
ប្តឹងទៅសម្តេចក្រឡាហោម ស ខេង ពីបញ្ហារឿងពុករលួយរបស់ខ្លួន។
៤-រឿងពុករលួយចំពោះអ្នកទោស ដែលជាប់នៅអាគារ”ក”បន្ទប់លេខ៤ ដែលប្រើប្រាស់ទូរស័ព្ទស្មាតហ្វូនសេរីខុសពីច្បាប់ហាមឃាត់។
៥-រឿងរបបការហូបចុករបស់អ្នកទោស លិចលឺមកថាមួយថ្ងៃចំណាយ៥លានជាង តែការទិញម្ហូប+គ្រឿង ប្រហែលជិត៣លានតែប៉ុណ្ណោះ។
ហើយថ្មីៗនេះក៏មានការបែកធ្លាយអំពីភាពមិនប្រក្រតីក្នុងពន្ធនាគារខេត្តបន្ទាយមានជ័យពាក់ព័ន្ធការប្រមូលលុយ ពីកូនចៅម្នាក់ ៤៥០ ដុល្លា ទៅ ៥០០ ដុល្លា ជូនលោក អ៊ុង ស៊ីផាន ជាថ្នូរនឹងការរៀបចំ
អោយបានឡើងសក្តិតាមរយៈគណនេយ្យបេឡារបស់ខ្លួន។
មហាជនរងចាំមើលផងដែរថា តើដល់ពេលណាទើប ក្រសួងមហាផ្ទៃនឹងមានចំណាត់ការសមស្របណាមួយដើម្បីលុបបំបាត់ភាពមិនប្រក្រតីក្នុងអង្គភាពពន្ធនាគារខេត្តបន្ទាយមានជ័យ និងដើម្បីភាពសុខសាន្តស្ងប់ចិត្តមន្ត្រីពន្ធនាគារក្រោមឳវាទ៕
