កាលពីថ្ងៃទី ១៨ ខែកញ្ញា ឆ្នាំ ២០២១ កន្លងទៅ មហាជនអ្នកលេងបណ្តាញសង្គមហ្វេសប៊ុកជាច្រើនមានការភ្ញាក់ផ្អើលរួចហើយដែរ ក្រោយពីតារាចម្រៀង អ៊ីណូ បានសែនព្រេនស្ងាត់ៗជាមួយកូនក្រមុំយ៉ាងស្រស់ស្អាតម្នាក់ ដោយនាងក៏ជាអ្នករកស៊ីមួយរូបផងដែរ។
ក្រោយពីបានរៀបការស្ងាត់ៗបញ្ចប់ភាពនៅលីវ និង ចាប់ខ្លួនចាប់ផ្តើមចងចំណងប្រាំប្រកាហើយនោះ លោក អ៊ីណូ និង ភរិយា មិនត្រឹមតែបង្ហាញក្តីស្រឡាញ់ឱ្យគ្នាកាន់តែខ្លាំងឡើងនោះទេ តែលោក និង ភរិយា ហាក់កាន់តែចាប់ដៃគ្នាសម្រុកបង្កើតមុខជំនួញកាន់តែច្រើនឡើងជាបន្តបន្ទាប់ទៀត។
ជាក់ស្តែង បើគិតមកដល់ថ្ងៃទី ២៣ ខែកញ្ញា ឆ្នាំ ២០២១ នេះ គឺរយៈពេល ៥ ថ្ងៃហើយដែលលោក អ៊ីណូ បានរៀបការនឹងភរិយាដែលមានភាពប៉ិនប្រសប់ក្នុងការរកស៊ីដូចគ្នា រហូតធ្វើឱ្យអ្នកគាំទ្រធ្លោយមាត់សរសើរថាគូស្វាមីភរិយានេះ ពិតជាស្រុះគ្នារកស៊ីខ្លាំងណាស់។ យ៉ាងណាក៏ដោយ បើក្រឡេកទៅមើលភរិយារបស់លោក អ៊ីណូ ឯនោះវិញ ឃើញស្វាមីខិតខំប្រឹងប្រែងរកស៊ីទាំងថ្ងៃទាំងយប់ ស្រាប់តែនាងបានពោលពាក្យទៅកាន់ប្តីថា៖ «យប់មិញគ្រុនក្តៅហើយ ឥលូវថ្ងៃនេះនៅខំប្រឹងទៀត ប្តីអើយប្តី បងល្អពេកហើយ! ឆាប់ជាប្តីសម្លាញ់ អីណូ»៕
