ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ អញ្ជើញចូលរួមក្នុងពិធីបើកការដ្ឋានសាងសង់រមណីយដ្ឋាន ឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” ស្ថិតក្នុង ភូមិ៣ សង្កាត់១ ក្រុងព្រះសីហនុ ក្រោមអធិបតីភាពដ៏ខ្ពង់ខ្ពស់ របស់ឯកឧត្តម ឧបនាយករដ្ឋមន្ត្រី សាយ សំអាល រដ្ឋក្រសួង ដែនដីនគររូបនីយកម្ម និងសំណង់ ព្រមជាមួយលោកជំទាវ.
(ខេត្តព្រះសីហនុ) ឯកឧត្តម ម៉ោង ស៊ីណេត អភិបាលនៃគណៈ ខេត្តព្រះសីហនុ នាព្រឹកថ្ងៃទី១១ ខែមីនា ឆ្នាំ២០២៥ នេះ បាន អញ្ជើញចូលរួមក្នុងពិធីបើកការដ្ឋានសាងសង់រមណីយដ្ឋាន ឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” ស្ថិតក្នុង ភូមិ៣ សង្កាត់១ ក្រុងព្រះសីហនុ ក្រោមអធិបតីភាពដ៏ខ្ពង់ខ្ពស់ របស់ឯកឧត្តម ឧបនាយករដ្ឋមន្ត្រី សាយ សំអាល រដ្ឋក្រសួង ដែនដីនគររូបនីយកម្ម និងសំណង់និង លោក ជំទាវ.
ក្នុងនោះក៏វត្តមានឯកឧត្តម នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស លោកជំទាវ លោក ឧកញ៉ា មន្ត្រីរាជការ ប្រធានមន្ទីរ ព្រមទាំងអ្នកវិនិយោគទុនខ្មែរ និងបរទេស ជាច្រើនរូបទៀត.
បើតាមប្រភពដែលស្និទ្ធ និងម្ចាស់គំរោងលោក ឡូ សុគន្ធ ប្រធាន ក្រុមប្រឹក្សាភិបាល បានបង្ហើបប្រាប់អង្គភាពសារព័ត៌មានក្នុងខេត្ត ថាៈ គំរោងនេះមានឈ្មោះថា ព្រែកត្រែង ប៊ិច មែននេចមិន (Prek Treng Beach Management), ដែលត្រូវធ្វើការសាងសង់ចាប់ ផ្តើមពីថ្ងៃបើកការដ្ឋាននេះតទៅ នឹងអាចប្រើរយៈពេលចាប់ពី១០ខែ ទៅ១២ខែ ដោយក្រុមហ៊ុនគ្រោងនឹងចំណាយថវិកាសរុបចន្លោះ ចាប់ពី ២លានដុល្លារ ទៅ ៣លានដុល្លារ លើផ្ទៃដីសរុប១៤០០ម៉ែត្រ លាតសន្ធឹងលើឆ្នេរខ្សាច់ព្រែកត្រែងដ៏សក្បុស ស្ថិតនៅក្នុងសង្កាត់លេខ១ ក្រុងព្រះសីហនុ.
លោកបានបញ្ជាក់ទៀតថា រាល់ការចំណាយក្នុងការសាងសង់នូវ រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែក ត្រែង” នេះឡើងគឺក្នុងន័យជួយអភិវឌ្ឍប្រជាជនក្នុងតំបន់ ក៏ដូចជា សហគមន៍ក្នុងស្រុក ព្រោះនៅពេលបញ្ចប់គំរោងសាងសង់ ក្រុមហ៊ុន និងធ្វើតម្រូវអោយភ្ញៀវដែលមកលេងកំសាន្តត្រូវ បង់លុយ ហើយថវិកាដែលប្រមូលបានគឺក្រុមហ៊ុន នឹងបង្វិលទៅ ជួយឧបត្ថម្ភក្នុងសហគមន៍ ដូចប្រជាការពារជាដើម.
ខាងក្រោមជាវិសាលភាពនៃការស្ថាបនាគំរោង ព្រែកត្រែង មែននេចមិនៈ
១ រៀបចំក្រវាត់បៃតងតាមរយះការដាំដើមឈើ និងរៀបចំកន្លែងពិកនិក
២ ក្រាលក្រានីតសំរាប់ផ្លូវថ្មើរជើង
៣ តំឡើងកន្លែងអង្គុយ
៤ សាងសង់បន្ទប់ទឹកថ្មី
៥ រៀបចំចំណតរថយន្ត និងលូរំដោះទឹកភ្លៀង
៦ សាងសង់កន្លែងមើលថ្ងៃលិច
៧ សាងសង់បន្ទប់ស្តុកសំរាម
៨ រៀបចំកន្លែងលេងកីឡា & រៀបចំកន្លែងហាត់ប្រាណបែប ធម្មជាតិ
៩ ឡានម្ហូបដែលមានស្តង់ដារអន្តរជាតិ
១០ ជួសជុលកែលំអរកញ្ចុះចាស់ៗដែលមានស្រាប់សម្រាប់មនុស្សចាស់ និងក្មេងៗមកកំសាន្ត
១១ រៀបនិងតំឡើងឆ័ត្រស្បូវ
១២ រៀបចំ និងតំឡើងប្រព័ន្ធអាំងប្រព្រឹត្តិកម្ម
ផ្សាយៈថ្ងៃទី១១ ខែមីនា ឆ្នាំ២០២៥
ដោយ:និពន្ធនាយករងអង្គភាពអាស៊ានដេលីប្រចាំខេត្តព្រះសីហនុ.
សៅ វាសនា(Harry VS)
