ប្រជុំតារាប្រុសស្រីខ្មែរល្បីៗ ១០ រូប ធ្លាប់ជាអតីត Freshie Girl & Boy ដែលល្បីខ្លាំងនៅបច្ចុប្បន្ន

ជាការពិត បន្ទាប់ពីបានចូលប្រកួត និង ទទួលបានជ័យលាភីជា Freshie Gilr & Boy តាមជំនាន់នីមួយៗនោះ គេសង្កេតឃើញថាមានជ័យលាភីខ្លះក៏បានបាត់មុខឈឹងពីសិល្បៈ រីឯជ័យលាភីខ្លះក៏បានបន្តជាអាជីពសិល្បៈ ដែលបានសាងកេរិ៍ឈ្មោះបោះសំឡេងល្បីល្បាញលើវិថីសិល្បៈតាមសមត្ថភាព និង ទេពកោសល្យផ្សេងៗគ្នា ដោយបានក្លាយជាតារាប្រុសស្រីល្បីៗមកដល់បច្ចុប្បន្ន។

ថ្ងៃនេះ  នឹងនាំប្រិយមិត្តមកស្គាល់ តារាប្រុសស្រីល្បីៗខ្មែរ ១០ រូប ដែលធ្លាប់ទទួលបានជ័យលាភី Freshie Gilr & Boy និង បានវិវឌ្ឍខ្លួនក្លាយជាតារាល្បីៗប្រចាំប្រទេសនាសព្វថ្ងៃនេះ។ តារាប្រុសស្រីទាំង ១០ រូបនេះ រួមមាន៖

១. ញ៉ែម សុគន្ធ

លោក ញ៉ែម សុគន្ធ ជាពិធីករ និង តារាសម្ដែងប្រុសដ៏មានប្រជាប្រិយភាព ដែលលោកធ្លាប់ជាម្ចាស់ជ័យលាភី Freshie Boy លេខ៣ ជំនាន់ទី ១ ក្នុងឆ្នាំ២០០២។

២. ជា វិបុល

លោក ជា វិបុល ជាពិធីករល្បីឈ្មោះប្រចាំស្ថានីយទូរទស្សន៍ហង្សមាស ដែលសព្វថ្ងៃទទួលបានភាពជោគជ័យខ្លាំងក្នុងអាជីពរបស់ខ្លួន ដោយពិធីករល្បីឈ្មោះរូបនេះ ជាអតីត Freshie Boy លេខ១ ជំនាន់ទី ២ ក្នុងឆ្នាំ ២០០៣។

៣. លឹម ជាឡាយ

លោក លឹម ជាឡាយ ជាតារាសម្ដែងប្រុសរូបសង្ហាមានប្រជាប្រិយភាពខ្លាំងតាមរយៈការសម្ដែងខ្សែភាពយន្តជាច្រើន ដែលលោក តែងទទួលបានដំណែងជាតួឯកប្រុសស្ទើរគ្រប់សាច់រឿងដែលលោកបានសម្ដែង។ មុននឹងក្លាយជា តារាសម្ដែងប្រុសដ៏មានប្រជាប្រិយភាពនេះ លោកក៏ធ្លាប់បានចូលប្រកួត Freshie Gilr & Boy ដែលទទួលជ័យលាភី Freshie Boy លេខ ១ ជំនាន់ទី ៤ ក្នុងឆ្នាំ២០០៥។

៤. សុខ សោម៉ាវត្តី

អ្នកនាង សុខ សោម៉ាវត្តី ដែលជាតារាសម្ដែងស្រីដ៏ឆ្នើមម្នាក់ ទទួលបានការស្រឡាញ់គាំទ្រខ្លាំងពីគ្រប់ស្រទាប់យុវវ័យជាមួយនឹងការសម្ដែងខ្សែភាពយន្តខ្មែរជាច្រើន ដោយមានទេពកោសល្យយ៉ាងប៉ិនប្រសប់ និង ក្រមិចក្រមើមគួរឱ្យស្រឡាញ់ ដោយតារាស្រីរូបនេះ ក៏ធ្លាប់ជាអតីត Freishie Girl លេខ ២ ជំនាន់ទី ៥ ក្នុងឆ្នាំ ២០០៦។

៥. ហ៊ិន ចាន់នីរ័ត្ន

កញ្ញា ហ៊ិន ចាន់នីរ័ត្ន ជាពិធីការិនី និង តារាសម្ដែងស្រីសំណប់ចិត្តយុវវ័យ ដែលមានការស្រឡាញ់គាំទ្ររូបនាងខ្លាំង តាមរយៈទេពកោសល្យផ្សេងៗរបស់នាងក្នុងវិស័យសិល្បៈ ហើយ តារាស្រីរូបស្រស់នេះ ក៏ធ្លាប់ជាម្ចាស់ជ័យលាភី Freishie Girl លេខ១ ជំនាន់ទី ៦ ក្នុងឆ្នាំ ២០០៧។

៦. ប៊ីរីយ៉ា

អ្នកនាង ប៊ីរីយ៉ា ជាតារាសម្តែងស្រី និង តារាបង្ហាញម៉ូតរាងតូចខ្ពស់ស្រឡះសាច់សខ្ចី ដែល អ្នកនាង ក៏ជាអតីតម្ចាស់ជ័យលាភី Freishie Girl លេខ ២ ជំនាន់ទី ៧ ក្នុងឆ្នាំ ២០០៨។

៧. មាន សូនីតា

កញ្ញា មាន សូនីតា ដែលជាតារាសម្តែងស្រីល្បីឈ្មោះមួយដួងក្នុងវិស័យសិល្បៈ ព្រមទាំងមានរហ័សនាមជា «រាជិនីក្រមា» ដែលរូបនាង ធ្លាប់ជាអតីតម្ចាស់ជ័យលាភី Freishie Girl លេខ ៤ ជំនាន់ទី ៨ ក្នុងឆ្នាំ ២០០៩។

៨. ខាត់ វៃហាំង

លោក ខាត់ វៃហាំង ជាតារាសម្ដែងប្រុសមានរូបរាងស្រស់សង្ហា ដែលទទួលបានការចាប់អារម្មណ៍គាំទ្រខ្លាំងជាមួយទេពកោសល្យយ៉ាងប៉ិនប្រសប់ក្នុងការសម្ដែងភាពយន្តខ្មែរជាច្រើន ដោយសុទ្ធសឹងតែទទួលបានការគាំទ្រខ្លាំងពីទស្សនិកជន ហើយរូបលោកក៏ធ្លាប់បានឆ្លងកាត់ការប្រកួត Freshie Gilr & Boy ដែលជាប់ជ័យលាភី Freshie Boy លេខ ៤ ជំនាន់ទី ៩ ក្នុងឆ្នាំ ២០១០។

៩. ស៊ីន យូប៊ីន

កញ្ញា ស៊ីន យូប៊ីន ជាតារាសម្ដែងស្រី ដែលកំពុងតែក្ដោបបានប្រជាប្រិយភាពខ្លាំងក្នុងសង្គមសិល្បៈ មិនត្រឹមតែមានទេពកោសល្យ និងសមត្ថភាពក្នុងការសម្ដែងខ្សែភាពយន្តនោះទេ ថែមទាំងទទួលបានការចាប់អារម្មណ៍ខ្លាំងជាមួយរូបសម្រស់ មុខមាត់ញញឹមស្រស់យ៉ាងទាក់ទាញរបស់នាង ហើយមុននឹងឈានជើងប្រឡូកក្នុងវិស័យភាពយន្តនេះ នាងក៏ធ្លាប់ជា អតីត Freishie Girl លេខ ១ ជំនាន់ទី ១១ ក្នុងឆ្នាំ ២០១២។

១០. ពុធ ស្រីខួច

កញ្ញា ពុធ ស្រីខួច ក៏ជាតារាសម្ដែងស្រីមានទេពកោសល្យខ្លាំងក្នុងការសម្ដែង ព្រមទាំងរូបសម្រស់ស្អាតទាក់ទាញ ជាពិសេសមានថ្ពល់ខួចញញឹមស្អាតគួរឱ្យស្រឡាញ់ខ្លាំង។ ដោយតារាស្រីរូបនេះ ក៏ជាម្ចាស់ជ័យលាភី Freishie Girl លេខ ១ ជំនាន់ទី ១៣ ក្នុងឆ្នាំ ២០១៤៕