កណ្ដាល: ហេតុការណ៍នេះបានកើតឡើងកាលពីវេលាម៉ោង ៤នឹង០២នាទីល្ងាចថ្ងៃទី១៨ ខែវិច្ឆិកា ឆ្នាំ២០២១ នៅ ចំណុចភូមិស្ទឹង២ ឃុំសំរោងធំ ស្រុកកៀនស្វាយ ខេត្តកណ្ដាល។
ជនរងគ្រោះឈ្មោះ លាន់ ចាន់ ភេទប្រុស អាយុ ៣៣ឆ្នាំ ជនជាតិខ្មែរ មុខរបរកសិករ មានទីលំនៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល(ស្លាប់)។
នៅថ្ងៃ ខែ ឆ្នាំ វេលាម៉ោងដូចខាងលើ ជនរងគ្រោះ បានចុះទៅមើលមងនៅក្នុងបឹងក្រោយភូមិស្ទឹង ពេលកំពុងមើលមង ក៏ជាប់ពស់វែកក្របីមួយក្បាលទំងន់មួយគីឡូកន្លះ ឃើញដូច្នេះជនរងគ្រោះ បានដោះពស់វែកក្របីនោះដាក់ក្នុងទៃស្ពាយរួចយកមកផ្ទះ។
ពេលមកដល់ផ្ទះជនរងគ្រោះបានយកពស់វែកនោះចេញពីទៃ ហើយយកពស់វែកក្របីនោះពាក់លើស្មា ពេលនោះពស់វែកក្របីបានលូនចូលក្រោមគ្រែ ភ្លាមនោះជនរងគ្រោះបានយកដៃចាប់ពស់ វែកក្របី ស្រាប់តែពស់បានខាំដៃខាងស្ដាំ និងខាំបបូរមាត់មួយកន្លែងទៀត ។ ពេលនោះក្រុមគ្រួសារជនរងគ្រោះបានយកជនរងគ្រោះ ទៅផ្ទះគ្រូខ្មែរឈ្មោះ វ៉ាន់ ហួន ភេទស្រី អាយុ ៥៧ឆ្នាំ ជនជាតិខ្មែរ មុខរបរគ្រូមើលអ្នកត្រូវពស់ខាំ មានទីលំនៅភូមិ ឃុំ កើតហេតុ បានដាក់ថ្នាំឲ្យជនរងគ្រោះ តែជនរងគ្រោះមិនព្រមលេប បន្ទាប់មកឈ្មោះ វ៉ាន់ ហួន ភេទស្រី បានឲ្យក្រុមគ្រួសារជនរងគ្រោះ យកទៅផ្ទះវិញពេលមកដល់ផ្ទះ ជនរងគ្រោះក៏បានស្លាប់បាត់បង់ជីវិតតែម្តង។
ករណីខាងលើនេះ សពត្រូវបានសាច់ញាតិធ្វើបុណ្យតាមប្រពៃណី ៕
