ភ្នំពេញ÷ ល្បែងស៊ីសងអ៊ុីនធឺណេតតាមអនឡាញ ជាច្រើនកន្លែង កំពុងតែរីកដូចផ្សិតនៅក្នុងខណ្ឌដូនពេញ គ្មានញញើតនឹងសមត្ថកិច្ចបន្តិចសោះ។ជាក់ស្ដែង ដូចជាទីតាំង ផ្ទះល្វែងគ្មានលេខមួយកន្លែង តាមបណ្ដោយផ្លូវជាតិលេខ៥ ខាងជើងស្ពានជ្រោយចង្វាប្រហែល ៥០ម៉ែត្រ ស្ថិតនៅក្នុងសង្កាត់ស្រះចក និងទីតាំងផ្ទះលេខ៤៩ ផ្លូវលេខ៥៣ ក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ កំពុងបើកដំណើរការបានយ៉ាងសុខសប្បាយ មិនខ្វល់ពីសំណាក់សមត្ថកិច្ចចុះបង្ក្រាបឡើយ ព្រោះអ្នកមើលការនៅតាមទីតាំងទាំងនោះ បានអួតប្រាប់ជនញៀនល្បែង (លេងចុះមិនបាច់ព្រួយបារម្ភពីសមត្ថកិច្ចនោះឡើយព្រោះទីតាំងទាំងនោះមានខ្នងធំហើយក្រាស់នៅពីក្រោយ) ។
តាមប្រភពពីប្រជាពលរដ្ឋរស់នៅម្តុំនោះរាយការណ៍ឲ្យដឹងថាទីតាំងបើកល្បែងស៊ីសងតាមអនឡាញខាងលើ សុទ្ធតែជាជនញៀនថ្នាំ មានប្រុសមានស្រីមានក្មេងមានចាស់ ចូលលេងល្បែងមិនថាយប់មិនថាថ្ងៃ គ្មានញញើតនឹងសមត្ថកិច្ចឡើយ ប្រជាពលរដ្ឋសំណូមពរដល់មន្ត្រីពាក់ព័ន្ធ មេត្តាចាត់វិធានការទីតាំងល្បែងស៊ីសងទាំងនោះផង ដោយពួកគាត់បានពោលប្រាប់ថាមានការភ័យខ្លាចដោយសារតែក្រុមញៀនល្បែងទាំងនោះសុទ្ធតែប្រើប្រាស់ថ្នាំញៀន។
ក្នុងពេលនោះដែរប្រជាពលរដ្ឋក៏បានសំណូមពរដល់លោក សុខ ពេញវុធ អភិបាលនៃគណៈអភិបាលខណ្ឌដូនពេញ និងលោកទៀង ច័ន្ទសារ អធិការនៃអធិការដ្ឋាននគរបាលខណ្ឌដូនពេញ មេត្តាមានចំណាត់ការបង្ក្រាបនិងទប់ស្កាត់ចំពោះទីតាំងខាងលើនេះផងទាន ជៀសវាងប្រជាពលរដ្ឋនិងមហាជនរិះគន់ថាគ្មានសមត្ថភាពបង្ក្រាបល្បែងស៊ីសងទាំងអស់នេះ៕
ជុំវិញពាក់ព័ន្ធនិងការផ្សាយពីទីតាំងល្បែងស៊ីសងខាងលើនេះ អង្គភាពសារព័ត៌មានពេញចិត្តមេឌា រងចាំការស្រាយបំភ្លឺគ្រប់ស្ថាប័នពាក់ព័ន្ធរៀងរាល់ម៉ោងធ្វើការ