បវរកញ្ញាគ្រងមកុដ Miss Grand Cambodia 2020 កញ្ញា លីវ ជីលី កំពុងតែទទួលបានប្រជាប្រិយភាពខ្លាំងពីសំណាក់ទស្សនិកជន បន្ទាប់ពីនាងបង្ហាញវត្តមានយ៉ាងលេចធ្លោធ្វើជាគណៈកម្មការមួយរូបក្នុងការប្រឡងជ្រើសរើសបេក្ខនារីស្អាត និង មានសមត្ថភាពដាច់គេ ធ្វើជាម្ចាស់គ្រងមកុដ Miss Grand Cambodia 2021។
ដោយឡែក ស្រាប់តែថ្មីៗនេះ លីវ ជីលី ធ្វើឱ្យអ្នកគាំទ្រ ក៏ដូចជាអ្នកប្រើប្រាស់បណ្ដាញសង្គមហ្វេសប៊ុកជាច្រើនភ្ញាក់ផ្អើលមិនតិចនោះទេ បន្ទាប់ពីឃើញសារចាក់ដោតមួយរបស់នាង ក្នុងអត្ថន័យរៀបរាប់ពីចំណងមិត្តភាពមិនសមប្រកប ជួបតែមនុស្សអាត្មានិយម គិតតែពីផលប្រយោជន៍ផ្ទាល់ខ្លួន។
លីវ ជីលី បានសរសេររៀបរាប់នៅលើទំព័រហ្វេសប៊ុកផេកផ្លូវការរបស់នាងថា៖ «ខ្ញុំមិនដឹងថាតម្រូវការអ្នកជាអ្វីឱ្យពិតប្រាកដ ព្រោះពិភពលោកនេះសម្រាប់ខ្ញុំសម្បូរទៅដោយការសម្តែងដើម្បីផលប្រយោជន៍ និង ភាពអាត្មានិយមប៉ុណ្ណោះ ខ្ញុំតែងតែព្យាយាមបើកចិត្តទទួលយករឿងគ្រប់យ៉ាង ហើយមិត្តភាពដោយភាពស្មោះត្រង់បំផុត ទង្វើគ្រប់យ៉ាងផុសចេញពីក្រឪបេះដូង តែរឿងដែលទទួលបាននោះគឺមានតែពាក្យថា «ខកចិត្ត» ហើយខ្ញុំស្មើនឹងមនុស្សល្ងង់ នេះឬពាក្យថា «មិត្តភាព»?»៕
