ពិតជាហ៊ានមែន រឿងកាប់ទន្ទ្រានព្រៃលិចទឹក ស្នងការរង ស៊ុំ សុជាត ស្មគ្រ័ចិត្តប្រគល់ដីជាង ៦០០ហិកតាឱ្យរដ្ឋវិញ ផ្សាយចេញនៅថ្ងៃទី១ខែ ធ្នូឆ្នាំ២០២១
កំពង់ឆ្នាំង៖ ឯកឧត្តម ស៊ុន ស៊ុនវណ្ណារិទ្ធិ អភិបាលខេត្តកំពង់ឆ្នាំង បានបញ្ជាក់ឲ្យដឹង នៅព្រឹកថ្ងៃទី១ ខែធ្នូ ឆ្នាំ២០២១នេះថា លោកឧត្តមសេនីយ៍ត្រី ស៊ុំ សុជាតិ ស្នងការរង នៃស្នងការដ្ឋាននគរបាលខេត្តកំពង់ឆ្នាំង បានស្ម័គ្រចិត្តប្រគល់ដីព្រៃលិចចំនួន ៦៧៥ហិកតា ស្ថិតនៅក្នុងឃុំច្រណូក ស្រុកកំពង់លែង មកឲ្យរដ្ឋវិញ។
ឯកឧត្តម ស៊ុន ស៊ុនវណ្ណារិទ្ធិ បានបន្តថា ដីជាង ៦០០ហិកតានេះ គឺលោក ស៊ុំ សុជាតិ បានប្រគល់ឱ្យរដ្ឋវិញ កាលពីថ្ងៃ ២៩ ខែវិច្ឆិកា ឆ្នាំ២០២១ ហើយដីទាំងអស់នេះគឺបានមកដោយទិញពីប្រជាពលរដ្ឋ និងខ្លះទៀតបានដោយការឈូសឆាយបន្ថែម។
សូមរំលឹកថា នាពេលកន្លងមក ស្នងការរងនគបាលខេត្តកំពង់ឆ្នាំង លោក ស៊ុំ សុជាតិ រួមនឹងបក្សពួក ធ្លាប់ត្រូវបានមន្ត្រីជលផលនិងប្រជាពលរដ្ឋខេត្តកំពង់ឆ្នាំងដាក់ពាក្យប្តឹងជាបន្តពាក់ព័ន្ធនឹងសកម្មភាពកាប់រុករាន ទន្ទ្រាន ឈូសឆាយរំលោភយកដីព្រៃលិចទឹករបស់រដ្ឋនៅក្នុងភូមិសាស្ត្រឃុំច្រណូក ស្រុកកំពង់លែង ជាប់នឹងព្រំប្រទល់ខេត្តកំពង់ធំ មកធ្វើជាកម្មសិទ្ធផ្ទាល់ខ្លួន។
សូមរំលឹកថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី២៨ ខែវិច្ឆិកា ឆ្នាំ២០២១ បានចេញបទបញ្ជាយ៉ាងម៉ឺងម៉ាត់មួយ ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាប ត្រូវធ្វើការទប់ស្កាត់ និងបង្រ្កាបជាបន្ទាន់ ចំពោះការលួចកាប់ព្រៃលិចទឹក និងវាទទីយកដីនៅតាមបឹងទន្លេសាប។
អនុវត្តតាមបទបញ្ជារបស់សម្តេចតេជោ ហ៊ុន សែន ឯកឧត្តម ជា សុផារ៉ា ឧបនាយករដ្ឋមន្ដ្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានបង្កើតគណកម្មាធិការអន្តរក្រសួង និងបានដឹកនាំក្រុមការងារចម្រុះចុះបង្រ្កាបនិងស្រាវជ្រាវ ដោយដាក់ចេញនូវវិធានការដើម្បីកំណត់ឲ្យបានច្បាស់លាស់ អ្នកនៅពីក្រោយនៃការទន្ទ្រានដីព្រៃលិចទឹករបស់រដ្ឋ ដើម្បីចាត់វិធានការទៅតាមនិតិវិធីច្បាប់ដោយមិនមានការលើកលែង៕