ប្រហុកចូលរាប់សិបតោនពីវៀតណាម តាមច្រកជ្រៃធំ សង្ស័យមានគីមី
កណ្តាល៖ បើតាមសេចក្តីរាយការណ៍ពីប្រជាពលរដ្ឋសុំមិនបញ្ចេញឈ្មោះ បានប្រាប់អ្នកសារព័ត៌មានយើងឲ្យដឹងថា មានករណីនាំចូលប្រហុកសង្ស័យមានសារធាតុគីមី ប្រមាណជា ១០ ទៅ ១៥ តោនក្នុងមួយថ្ងៃៗតាមច្រកជ្រៃធំ ស្ថិតក្នុងស្រុកកោះធំ ខេត្តកណ្ដាល ជាប្រភេទ ប្រហុកត្រីប្រា ប្រហុកត្រីផ្ទក់ និងប្រហុកត្រីសាច់កិនចម្រុះគ្រប់ប្រភេទ ដើម្បីចែកចាយ ក្នុងភូមិសាស្ត្រខេត្តកណ្ដាល ខេត្តតាកែវ រាជធានីភ្នំពេញ និងបណ្ដារាជធានីខេត្ត ស្រុក ក្រុង មួយចំនួនទៀត។
បើតាមការរៀបរាប់ពីប្រជាពលរដ្ឋដែលជាអ្នកទទួលយកប្រប្រហុកលក់បន្ត បានឲ្យដឹងទៀតថា ឈ្មោះ តាងៀ ជាជនជាតិវៀតណាម គឺជាអ្នកនាំប្រប្រហុកពីប្រទេសវៀតណាមដែលល្បីថា មានសារធាតុគីមី សូម្បីរុយអត់ហ៊ានរោមផង យកមកបោះដុំឲ្យពួកគាត់ ដែលមានកូនបង្កើត ឈ្មោះ ហឿង ភេទ ស្រី អាយុ ៣៣ ឆ្នាំ យកទៅលក់បន្តតាមភូមិស្រុកខេត្តក្រុង។
ពួកគាត់បន្ថែមទៀតថា ពួកគេប្រើរូបភាពនាំចូលដោយលិខិតអនុញ្ញាតឲ្យដឹកជញ្ជូនផលិតផលជលផលនាំចូល ក្រោមរូបភាពជាត្រីទឹកសាប ត្រីកាហែ ត្រីឆ្ពិន ត្រីកាប ឬត្រីទីឡាព្យា របស់អាជ្ញាធររដ្ឋបាលជលផលនៃក្រសួងកសិកម្ម រុក្ខាប្រមាញ់និងនេសាទ តែតាមការពិតនៅក្នុងបាវសុទ្ធតែប្រហុកត្រីគ្រប់ប្រភេទ។ចំណែកនៅក្នុងលិខិតអនុញ្ញាតិនោះមានឈ្មោះ ថៃ សុធា ភេទប្រុស អាយុ៤១ ឆ្នាំ សញ្ជាតិខ្មែរ មានទីលំនៅ ភូមិព្រៃប៉ុក ឃុំព្រៃស្ពឺ ស្រុកកោះធំ ខេត្តកណ្តាល ដែលមានលេខទូរស័ព្ទ ០៩៧៣២៦២៦២៦ ជាអ្នកទទួលរត់ការផ្លូវនាំចូល។
ប្រជាពលរដ្ឋស្នើសុំឲ្យអាជ្ញាធរ និងមន្ត្រីពាក់ព័ន្ធទាំងអស់មេត្តាចុះពិនិត្យ និងទប់ស្កាត់ផង ព្រោះកន្លងមករឿងនាំប្រប្រហុកពីប្រទេសវៀតណាមយកមកលក់នេះ ត្រូវបានហាមឃាត់ និងបិទមិនឲ្យនាំចូលនោះទេ ព្រោះមានផលប៉ះពាល់សុខភាពសាធារណៈប្រជាពលរដ្ឋធ្ងន់ធ្ងរណាស់ ៕
