ខេត្តបន្ទាយមានជ័យ ៖ នៅតាមបណ្តាក្រុង ស្រុក នៃខេត្តបន្ទាយមានជ័យរងការប៉ះពាល់ដោយសារជំនន់ទឹកភ្លៀង ក្នុងរយៈពេលប៉ុន្មានថ្ងៃមកនេះនឹងនៅពេលខាងមុខ ។ នេះបើតាមរដ្ឋបាលខេត្តបន្ទាយមានជ័យ ។
យោងតាមរដ្ឋបាលខេត្តបន្ទាយមានជ័យ បានជម្រាបជូនដល់បងប្អូនប្រជាពលរដ្ឋគ្រប់មជ្ឈដ្ឋានទូទាំងខេត្តថា យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមចុះថ្ងៃទី២១ ខែកញ្ញា ឆ្នាំ២០២១ ស្តីពីស្ថានភាពអាកាសធាតុបានឲ្យដឹងថា នៅថ្ងៃទី២២-២៦ ខែកញ្ញា ឆ្នាំ២០២១ ព្រះរាជាណាចក្រកម្ពុជាទទួលរងនូវឥទ្ធិពលប្រព័ន្ធសម្ពាធទាប (ITCZ) ដែលអូសបន្លាយកាត់លើតំបន់ជួរភ្នំដងរែក និងខ្ពង់រាបភាគឦសានជាមួយនឹងខ្យល់មូសុងនិរតីបក់នៅក្នុងល្បឿនមធ្យមទៅបង្គួរអាចនឹងមានភ្លៀងធ្លាក់ក្នុងកម្រិតមធ្យមទៅច្រើន ដែលនឹងអាចបង្កជាជំនន់ទឹកភ្លៀង។
ប្រភពបន្តថាដោយឡែក តាមបណ្តាក្រុង-ស្រុក នៃខេត្តបន្ទាយមានជ័យយើងអាចនឹងទទួលរងផលប៉ះពាល់ដោយសារជំនន់ទឹកហូរធ្លាក់ពីខាងខេត្តបាត់ដំបង និងពីប្រទេសថៃ ។
រដ្ឋបាលខេត្តបញ្ជាក់ថា ៖ ដូចនេះរដ្ឋបាលខេត្ត សូមក្រើនរំលឹកដល់ បងប្អូនប្រជាពលរដ្ឋរស់នៅក្នុងភូមិសាស្ត្រក្រុង-ស្រុក ទូទាំងខេត្ត សូមមេត្តាបង្កើនការប្រុងប្រយ័ត្នខ្ពស់ និងត្រៀមបង្ការគ្រោះទឹកជំនន់ដែលអាចបង្កធ្វើឲ្យបងប្អូន ប្រជាពលរដ្ឋ ផ្ទះសម្បែង សត្វពាហនៈ ទ្រព្យសម្បត្តិផ្សេងៗ រងគ្រោះ និងខូចខាតជាយថាហេតុ»។
បើតាមរដ្ឋបាលខេត្តបានឲ្យដឹងថា លោកអ៊ុំ រាត្រី អភិបាលខេត្តបន្ទាយមានជ័យ អមដំណើរដោយលោក រត្ន័ ដាស៊ីណង់ អភិបាលស្រុកមង្គលបូរី បានអញ្ជើញចុះពិនិត្យមើលស្ថានភាពទឹកផ្នែកខាងលិចភូមិបត់ត្រង់ ឃុំបត់ត្រង់ ស្រុកមង្គលបូរី និង ពិនិត្យមើលស្ថានភាពបងប្អូនប្រជាពលរដ្ឋឡើងមកទីទួលសុវត្ថិភាពក្បែរផ្លូវវាងក្រុង ចំនួន ២០ គ្រួសារ នាព្រឹកថ្ងៃទី២៣ ខែកញ្ញា ឆ្នាំ២០២១។
ជាមួយគ្នានោះ ឯកឧត្តមអភិបាលខេត្ត និងលោកអភិបាលស្រុក បានផ្តល់អំណោយ គ្រឿងបរិភោគជាឃីតមួយគ្រួសារ ១កញ្ចប់ និងផ្តល់ តង់បាំងជម្រកស្នាក់នៅ ទឹកបរិសុទ្ធ ហូបចុកជូនពួកគាត់ ។
រដ្ឋបាលបានឲ្យដឹងថា គិតត្រឹមថ្ងៃទី២៣ ខែកញ្ញានេះ ស្ថានភាពទឹកមានសភាពកើតឡើងតាមដងស្ទឹងមង្គលបូរី សិរីសោភ័ណ និងអមផ្លូវវាងក្រុងសិរីសោភ័ណ ប៉ុន្តែមិនទាន់មានបញ្ហាអ្វីធ្ងន់ធ្ងរនោះទេ មិនទាន់មានការលិចលង់៕