មេឈ្មួញក្រាក់ៗកាប់បំផ្លាញព្រៃឈើនឹងដឹកជញ្ជូនចេញពីតំបន់ព្រៃឡង់ខេត្តស្ទឹងត្រែង និងខេត្តក្រចេះ ជ្រកក្រោមស្លាកក្រុមហ៊ុម ស៊ីងបាយអូថេក ថ្ងៃចេញផ្សាយៈ នៅថ្ងៃទី2, ខែមករាឆ្នាំ2022
ខេត្តស្ទឹងត្រែង: ប្រភពពីប្រជាពរដ្ឋបានឲ្យដឹងថា បទល្មើសកាប់បំផ្លាញព្រៃឈើនិងដឹកជញ្ជូនឈើខុសច្បាប់ក្នុងខេត្តស្ទឹងត្រែង និងខេត្តក្រចេះ បានបញ្ជាក់ថា ករណីឈ្មួញកាប់បំផ្លាញព្រៃឈើ ខុសច្បាប់ច្រៀកអារឈើ ដឹកជញ្ជូនចេញពីតំបន់ព្រៃឡង់ ស្រុកសៀមបូក ខេត្តស្ទឹងត្រែង និងព្រៃឡង់នៅស្រុកសំបូរ ខេត្តក្រចេះ ជ្រកក្រោមស្លាកក្រុមហ៊ុន់ស៊ីងបាយអូថេក គឺមានការឃុបឃិតពីមន្ត្រីពុករលួយ។
ប្រភពបានឲ្យដឹងទៀតថា បើគ្មានការបើកដៃពីមន្ត្រីបរិស្ថាន និងមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធទេនោះ គឺឈ្មួញឈ្មោះ ហេង សុខជា ហៅសណ្តាន ព្រមទាំងឈ្មោះ ភាជ សុផាត ជាមន្ត្រីនគរបាលនៅប៉ុស្តិ៍សណ្តាន់ និងឈ្មោះ សាយ ប្រាំង ជាមេសន្តិសុខក្រុមហ៊ុនស៊ីងបាយអូថេក មិនអាចកាប់ឈើ ដឹកជញ្ជូនចេញពីតំបន់ព្រៃឡង់ជ្រកក្រោមស្លាកស៊ីងបាយអូថេក បានឡើយ។
ប្រជាសហគមន៍ព្រៃឡង់ក្នុងស្រុកសៀមបូក ខេត្តស្ទឹងត្រែង និងនៅស្រុកសំបូរ ខេត្តក្រចេះ បានអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន ចាត់វិធានការទប់ស្កាត់សកម្មភាពបំផ្លាញព្រៃឡង់ក្នុងមូលដ្ឋានរបស់ពួកគាត់ជាបន្ទាន់។
ប្រភពពីប្រជាសហគមន៍ព្រៃឡង់ក្នុងស្រុកសៀមបូក ខេត្តស្ទឹងត្រែង និងស្រុកសំបូរ ខេត្តក្រចេះ បានបញ្ជាក់ឲ្យដឹងទៀតថា បើគ្មានការបើកដៃពីមន្ត្រីបរិស្ថានប្រចាំតំបន់ព្រៃឡង់នោះ គឺឈ្មួញឈ្មោះ ហេង សុខជា ហៅសណ្តាន់ និងបក្ខពួកឈ្មោះ ភាជ សុផាត ឈ្មោះ សាយ ប្រាំង មិនអាចចូលព្រៃកាប់ឈើ អារច្រៀកឈើតាមអំពើចិត្តនោះបានឡើយ។
ទន្ទឹមនឹងនេះការដែលឈ្មួញដឹកជញ្ជូនឈើឆ្លងកាត់ដីក្រុមហ៊ុនស៊ីងបាយអូថេក និងក្រុមហ៊ុនស៊ីអេកប៊ីភី យ៉ាងរលូនដោយមានការឃុបឃិតពីមន្ត្រីជំនាញ និងសមត្ថកិច្ចពាក់ព័ន្ធផងដែរ ដោយមានការបែងចែកផលប្រយោជន៍គ្នាយ៉ាងរលូនទៀតផង។ រហូតមកដល់ពេលនេះឈ្មួញឈ្មោះ ហេង សុខជា និងបក្ខពួកនៅតែគេចផុតពីវិធានការផ្លូវច្បាប់ ហើយផ្លាស់ប្តូរសកម្មភាពបំផ្លាញព្រៃឡង់យ៉ាងពេញបន្ទុកដដែល។
ករណីមានការរិះគន់ចំៗថា លោក ឆាយ ឌួងសាវុធ ប្រធានមន្ទីរបរិស្ថានខេត្តក្រចេះ ជាអ្នកបណ្តោយឲ្យមន្ត្រីបរិស្ថានប្រចាំតំបន់ព្រៃឡង់ ស្រុកសំបូរ ខេត្តក្រចេះ ធ្វើអ្វីៗតាមអំពើចិត្ត ហើយលោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង នៅតែបណ្តោយឲ្យមន្ត្រីបរិស្ថានប្រចាំតំបន់ព្រៃឡង់ ស្រុកសៀមបូក ក៏ធ្វើអ្វីៗតាមតែទំនើងចិត្តរបស់ពួកគេដែរ។
ហេតុនេះហើយទើបមន្ត្រីបរិស្ថានប្រចាំតំបន់ព្រៃឡង់ ស្រុកសំបូរ ខេត្តក្រចេះ និងស្រុកសៀមបូក ខេត្តស្ទឹងត្រែង បានបើកដៃឲ្យឈ្មួញឈ្មោះ ហេង សុខជា ហៅសណ្តាន់ និងបក្ខពួកដែលជ្រកក្រោមស្លាកក្រុមហ៊ុនស៊ីងបាយអូថេក កាប់ឈើដឹកជញ្ជូនចេញពីព្រៃឡង់យ៉ាងគឃ្លើន។
យ៉ាងណាក៏ដោយលើបញ្ហានេះដោយមានសេចក្តីព្រួយបារម្ភពីសេចក្តីវិនាសនៃព្រៃឡង់ ទើបប្រជាសហគមន៍អំពាវនាវឲ្យលោក វ៉ា ថន អភិបាលខេត្តក្រចេះ និងលោក ស្វាយ សំអ៊ាង អភិបាលខេត្តស្ទឹងត្រែង ព្រមទាំងលោក សាយ សំអាល់ រដ្ឋមន្ត្រីក្រសួងបរិស្ថាន ចាត់វិធានការទប់ស្កាត់រាល់បទល្មើសបំផ្លាញព្រៃឡង់ជាបន្ទាន់
