ទោះបីជាថ្នាំជក់ត្រូវបានផ្សារភ្ជាប់យ៉ាងខ្លាំងជាមួយមហារីកសួតតាមមតិសាធារណៈក៏ដោយ វាក៏នាំឱ្យមានជម្ងឺបេះដូងឬបញ្ហាសុខភាពផ្សេងទៀត។ វាប៉ះពាល់ទៅស្ទើរតែគ្រប់ផ្នែកនៃរាងកាយរបស់មនុស្សយើង មិនថាសួតឬបេះដូងទេ។ ថ្ងៃនេះ អ្នកនឹងបានស្គាល់ពីផលប៉ះពាល់៣ធំៗ ដែលបណ្តាលមកពីការជក់បារី។
១. ជម្ងឺបេះដូង
ជាតិនីកូទីននៅក្នុងបារី កាត់បន្ថយបរិមាណអុកស៊ីសែន ដែលបេះដូងរបស់អ្នកទទួលបាន ហើយថែមទាំងបង្កើនចង្វាក់បេះដូងរបស់អ្នក ដែលធ្វើឱ្យមានភាពតានតឹងលើបេះដូងអ្នកថែមទៀត។ ការស្លាប់ម្នាក់ក្នុងចំណោម ៥នាក់ ដោយសារជម្ងឺបេះដូងគឺទាក់ទងដោយផ្ទាល់ទៅនឹងការជក់បារី។
២. ការឡើងរឹងរបស់លិង្គ
ការស្រាវជ្រាវជាច្រើនបានរកឃើញថា ការជក់បារីគឺជាកត្តាចំបងនៃបញ្ហាមិនឡើងរឹងរបស់លិង្គ។ ការជក់បារីបណ្តាលឱ្យមានការបង្កើតកំណកនៅក្នុងសរសៃឈាម និងរាំងស្ទះដល់លំហូរឈាម។ នៅក្នុងការសិក្សាមួយ បុរសដែលជក់បារីច្រើនជាង ២០ដើមក្នុងមួយថ្ងៃ មានហានិភ័យខ្ពស់ជាង ៦០%ក្នុងការវិវត្តទៅជាជម្ងឺលិង្គងាប់។
៣. មហារីកសួត
មនុស្សស្លាប់ដោយសារជម្ងឺមហារីកសួតច្រើនជាងប្រភេទមហារីកដទៃទៀត។ ការជក់បារីគឺជាកត្តាហានិភ័យលេខមួយ សម្រាប់ជម្ងឺមហារីកសួត។ វាទទួលខុសត្រូវចំពោះ ៨៧% នៃការស្លាប់ដោយសារជម្ងឺមហារីកសួត។ ឱកាសរបស់អ្នកដែលនៅរស់រានមានជីវិត ៥ឆ្នាំបន្ទាប់ពីធ្វើរោគវិនិច្ឆ័យថាមានជម្ងឺមហារីកសួត គឺតិចជាង ១ក្នុងចំណោម ៥នាក់៕