ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានអញ្ជើញដឹកនាំមន្ត្រីចុះពិនិត្យទីតាំងកសិដ្ឋានដាំបន្លែ ហ័រណុង ហួយ អេកូឡូជីខល ឯ.ក ស្ថិតនៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ។
(ខេត្តព្រះសីហនុ): នារសៀលថ្ងៃទី៧ ខែមីនា ឆ្នាំ២០២៥ ឯកឧត្តម វង្ស ផាណាត ប្រធានក្រុមប្រឹក្សាខេត្ត និងឯកឧត្តម ម៉ោង ស៊ីណេត អភិបាល នៃ គណៈអភិបាលខេត្តព្រះសីហនុ បានអញ្ជើញដឹកនាំមន្ត្រីចុះពិនិត្យ ទីតាំងកសិដ្ឋានដាំបន្លែ ហ័រណុងហួយ អេកូឡូជីខល ឯ.ក ស្ថិតនៅភូមិចាំស្រី ឃុំកំពង់សីលា ស្រុកកំពង់សីលា ខេត្ត ព្រះសីហនុ។
កសិដ្ឋានដាំបន្លែ ហ័រណុងហួយ អេកូឡូជីខល ឯ.ក មានផ្ទៃដីជាង ៣ហិកតា ធ្វើការដាំដុះបន្លែ ផ្លែឈើមានដូចជា ផ្លែទំពាំងបាយជូរ ម្ទេស ប៉េងប៉ោះ ស្ពៃស្រួយ សាឡាត់ធ្វើ កាឆាយ ដើមជន្លង់ ត្រសក់ និងស្រះចិញ្ចឹមត្រី និងដំណាំដ៏ទៃទៀត។ល។
កសិដ្ឋាននេះ បានរៀបចំចាប់ផ្តើមកាលពីខែមករាឆ្នាំ២០២៤ ដោយផ្តោតសំខាន់ការដាំដុះបន្លែធម្មជាតិ គ្មានជាតិគីមី នេះជាការចាប់ផ្តើមសាកល្បងដាំដុះតែប៉ុណ្ណោះ ព្រោះនៅតំបន់នេះ វាមានអំណោយផលល្អ ក្នុងការដាំដុះបន្លែ ផ្លែឈើធម្មជាតិដែល គ្មានជាតិគីមី ចំពោះដីវិញ យើងធ្វើដោយខ្លួនឯង គឺមានធាតុផ្សំ ដូចជា អាចម៌គោ អាចម៌មាន់ អាចម៌ទា ដី និងអង្កាមយកលាយ ធ្លាប់ជាការស្រេច។
ដោយឡែកម្ចាស់កសិដ្ឋានជាជនជាតិចិន លោកបានប្រាប់ក្រុមបងប្អូនអ្នកសារព័ត៌មានយេីងថា កសិដ្ឋានកំពុងតែរកទីតាំងដែលធំជាងនេះក្នុងការពង្រីកបន្ថែមនូវការដាំដុះរបស់គាត់ ក៏ដូចជាចង់លេីកកំពស់មុខមាត់ខេត្តព្រះសីហនុ នឹងប្រទេសកម្ពុជាផងដែរ ក្នុងវិស័យកសិកម្មដាំដុះបន្លែបែបទំនេីបកម្មនេះ ដោយគាត់បានលេីកឡេីងថាចង់អោយប្រជាជនក្នុងស្រុកបានស្គាល់ និងដឹងថាប្រទេសកម្ពុជាក៏មានកសិដ្ឋានដាំដុះបន្លែគ្រប់ប្រភេទបែបទំនេីបកម្មមិនចាញ់តាមបណ្តាប្រទេសមួយចំនួនក្នុងលោក.
ឯកឧត្តម ម៉ាង ស៊ីណេត អភិបាលខេត្តព្រះសីហនុ ក៏បាន ថ្លែងអំណរគុណកសិដ្ឋានដាំបន្លែ ហ័រណុងហួយ អេកូឡូជីខល ឯ.ក ដែលបានជឿជាក់លើរាជរដ្ឋាភិបាលកម្ពុជា ក្នុងការបោះទុន វិនិយោគលើដំណាំបន្លែផ្លែឈើធម្មជាតិនៅក្នុងស្រុកកំពង់សីលានាពេលនេះ ហើយ
កសិដ្ឋានក៏ជួយបង្កើនការងារជូនបងប្អូន ប្រជាពលរដ្ឋអ្នកស្រុកកំពង់សីលា និងធ្វើការនាំចូលបន្លែផ្លែឈើទាំងអស់នេះចូលទីផ្សារក្នុងខេត្តព្រះសីហនុ និងបន្តធ្វើការ ចែកចាយទៅកាន់បណ្តាទីផ្សារនៅក្នុងរាជធានី ខេត្ត ក្នុង ព្រះរាជាណាចក្រកម្ពុជា ជាពិសេសចូលរួមកាត់បន្ថយការនាំចូល បន្លែផ្លែឈើពីប្រទេសជិតខាង ដែលមានផលប៉ះពាល់ដល់ សុខុមាលភាពអ្នកបរិភោគ។
ផ្សាយ:ថ្ងៃទី៨ ខែមីនា ឆ្នាំ២០២៥
ដោយ:និពន្ធនាយករងអង្គភាពអាស៊ានដេលីប្រចាំខេត្តព្រះសីហនុ.
សៅ វាសនា(Harry VS)
