អ្នកនាំពាក្យរងក្រសួងមហាផ្ទៃ: ១៣ថ្ងៃ មន្ត្រីផ្សព្វផ្សាយគោលនយោបាយ ភូមិ-ឃុំ-សង្កាត់មានសុវត្ថិភាពជាង៦ពាន់លើក!។

(ភ្នំពេញ)​: មន្ត្រីអាជ្ញាធរសម្រេចបានផ្សព្វផ្សាយ គោលនយោបាយភូមិ-ឃុំ-សង្កាត់មាន សុវត្ថិភាពជាង៦ពាន់លើក មានប្រជាពលរដ្ឋ ចូលរួមជាង៣សែននាក់ទូទាំងរាជធានី ខេត្ត ក្នុងរយៈពេល១៣ថ្ងៃ ចាប់ពីថ្ងៃទី១១ រហូតដល់ ថ្ងៃទី២៣ ខែមីនា ឆ្នាំ២០២៥។ នេះបើតាម អ្នកនាំពាក្យរងក្រសួងមហាផ្ទៃ លោក ទូច សុឃៈ ។

ខ្លឹមសារសំខាន់នៃគោលនយោបាយភូមិ-ឃុំ-សង្កាត់ មានសុវត្ថិភាព រួមមាន ការទប់ស្កាត់បទល្មើសក្នុង សង្គម ការផ្តល់សេវាសាធារណៈ ទប់ស្កាត់អំពើ អនាចារ ការជួញដូរមនុស្ស ការងារអនាម័យនិង បរិស្ថាន ការទប់ស្កាត់គ្រោះថ្នាក់សង្គមលើពលរដ្ឋ និង ការដោះស្រាយវិវាទក្រៅប្រព័ន្ធតុលាការជាដើម។

បើតាម លោក ទូច សុឃៈ ការផ្សព្វផ្សាយ គោលនយោបាយបាយនេះ មានគោលដៅបំផុសឱ្យ ប្រជាពលរដ្ឋយល់ដឹង និងចូលរួមសហការជាមួយ អាជ្ញាធរ ដើម្បីពង្រឹងការថែរក្សាសន្តិសុខ ធានា គុណភាពសេវាសាធារណៈ និងភាពសុខដុមរមនា របស់ប្រជាពលរដ្ឋនៅមូលដ្ឋាន បន្ថែមលើការអនុវត្ត តួនាទី និងភារកិច្ចរបស់អាជ្ញាធរ៕

ផ្សាយ​:ថ្ងៃទី​២៧ ខែមីនា​ ឆ្នាំ២០២៥​

អត្ថ​បទ​: កញ្ញា សេង សុខហ៊ុន មន្ត្រីព័ត៌មានក្រុមអ្នកនាំពាក្យក្រសួងមហាផ្ទៃ

ដោយ:និពន្ធ​នាយករង​អង្គភាព​អាស៊ាន​ដេ​លី

សៅ​ ​វាសនា​(Harry​ VS)