សមិទ្ធផលថ្មីកំពុងបន្តអភិវឌ្យនៃទឹកដីស្រុកកងមាស នឹងស្រុកបាធាយ ក្រោមកិច្ចផ្តួចផ្តើម ឯកឧត្តម អ៊ុន ចាន់ដា និងក្រោមការអភិវឌ្ឍសម្តេចបវរធីបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា
ចេញផ្សាយថ្ងៃទី30 ខែមីនា ឆ្នាំ2025
ខេត្តកំពង់ចាម៖ ការអភិឌ្ឃននិងការកសាងបន្តពីរាជរដ្ឋាភិបាលចាស់នៅតែបន្តកសាង ក្រោមការដឹកនាំ សម្តេចបវរធីបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា អណត្តិទី7នេះ ។
ជាក់ស្តែងនៅព្រឹកថ្ថៃទី 30 ខែមីនា ឆ្នាំ2025 នេះ ឯកឧត្តម លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន និងឯកឧត្ដម អ៊ុន ចាន់ដា អភិបាលខេត្តកំពង់ចាម បានដឹកនាំគណប្រតិភូ ប្រារព្វពិធីក្រុងពាលីបួងសួងសុំម្ចាស់ទឹកម្ចាស់ដី ដើម្បីសាងសង់ស្ពានបេតុង “ស្ទឹងឆ្វេង” ដែលស្ថិតនៅព្រំប្រទល់ភូមិស្ទឹងឆ្វេង ឃុំច្បារអំពៅ ស្រុកបាធាយ និងភូមិអូរស្វាយលិច ឃុំព្រែកកុយ ស្រុកកងមាស ខេត្តកំពង់ចាម ។
ដែលគម្រោងស្ថាបនានេះ រួមមាន ៖ស្ពានបេតុងសរសៃដែកប្រវែង 84ម៉ែត្រ ទទឹង 10ម៉ែត្រ និងស្ថាបនាផ្លូវសងខាងក្បាលស្ពាន ប្រភេទកៅស៊ូពីរស្រទាប់ស្តើង (DBST) ប្រវែង 287ម៉ែត្រ នឹងទទឹង 8ម៉ែត្រ ចិញ្ចើមដីល្បាយថ្ម 1ម៉ែត្រសង ខាង ហើយគ្រោងប្រើប្រាស់ពេលវេលាសាងសង់ រយៈពេល 1ឆ្នាំ។
ចំពោះសំណង់ដែលត្រូវស្ថាបនាខាងលើនោះ ជាប្រយោជន៍ដើម្បីសម្រួលដល់ការធ្វើដំណើរឆ្លងកាត់របស់បងប្អូនប្រជាពលរដ្ឋ ជាពិសេសសិស្សានុសិស្សក្នុងតំបន់នោះ ឱ្យមានភាពងាយស្រួល និងមានសុវត្ថិភាពជាងមុន។
គួររំលឹកផងដែរថា៖ នៅចំណុចស្ទឹងឆ្វេងនោះ នៅពេលទឹកជំនន់ម្ដងៗ ធ្វើឲ្យប្រជាពលរដ្ឋមានការលំបាកក្នុងការធ្វើដំណើរឆ្លងកាត់ រីឯសិស្សានុសិស្ស ត្រូវឆ្លងទូកដើម្បីមកសិក្សារៀនសូត្រ ។ ដោយមើលឃើញពីការលំបាករបស់ប្រជាពលរដ្ឋ និងប្អូនៗសិស្សានុសិស្ស ទើបអាជ្ញាធរខេត្ត ដែលមាន ឯកឧត្ដម អ៊ុន ចាន់ដា ជាគណអភិបាលខេត្តកំពង់ចាម ផ្តួចផ្តើមគំនិត និងក្រោមការអភិវឌ្ឍ របស់សម្តេចបវរធីបតី ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា អណត្តិទី7នេះ បានចាត់ចែងឲ្យក្រសួងសាធារណការនិងដឹកជញ្ជូន បានរៀបចំឲ្យមានការស្ថាបនាស្ពាននោះឡើង ដើម្បីដោះស្រាយទុក្ខលំបាករបស់ប្រជាពលរដ្ឋ និងក្មួយៗសិស្សានុសិស្ស ដើម្បីកាត់បន្ថយការចំណាយ ក៏ដូចជាហានិភ័យ ពីការលង់ទឹកនារដូវទឹកឡើងផងដែរ។
សូមបព្ជាក់ផងដែរថា ៖ ក្រោយពីបញ្ជប់កម្មពិធី សម្ពោធបើកការដ្ឋានសាងសង់ស្ពានបេតុង “ស្ទឹងឆ្វេង”ឯកឧត្ដម អ៊ុន ចាន់ដា អភិបាលខេត្តកំពង់ចាម បានដឹកនាំប្រតិភូ រាជរដ្ឋាភិបាលដែលមាន ឯកឧត្ដម ប៊ុន ហ៊ាន រដ្ឋលេខាធិការក្រសួងធនធានទឹក បន្តចុះជួបប្រជាពលរដ្ឋជាង 3,000គ្រួសារទៀត ក្នុងឃុំចំនួន3 នៃស្រុកកងមាស ដោយបានទទួលប្រព័ន្ធធារាសាស្ត្រ ជាសមិទ្ធផលថ្មី សម្រាប់បង្កបង្កើនផលដំណាំកសិកម្ម ប្រព័ន្ធធារាសាស្ត្រ ជូនដល់ប្រជាពលរដ្ឋ ក្នុងឃុំព្រែក្របៅ ឃុំព្រែកក្របៅ ស្រុកកងមាស ដើម្បីជាប្រយោជន៍បានទឹកស្រោចស្រព ក្នុងការបង្កបង្កើនផលដំណាំកសិកម្ម។
ថ្លែងក្នុងឱកាសនេះដែរ ឯកឧត្តម ប៊ុន ហ៊ាន
រដ្ឋលេខាធិការក្រសួងធនធានទឹក និងឧតុនិយម បានលើកឡើងថា៖ សំណង់ប្រព័ន្ធធារាសាស្ត្រនេះ មានសំណង់សិល្បការ ទ្វារ2ចំនួន2កន្លែង សំណង់លូចំនួន 2កន្លែង និងប្រឡាយទាំងមូលនេះមានប្រវែង 2,700ម៉ែត្រ ដែលបានប្រើប្រាស់ពេលវេលាសាងសង់រយៈពេល 4ខែ។
ឯកឧត្ដមរដ្ឋលេខាធិការបានបញ្ជាក់ថា៖ សំណង់ប្រព័ន្ធធារាសាស្ត្រនេះ អាចបម្រើផលប្រយោជន៍ដល់ប្រជាពលរដ្ឋចំនួន ៣,០៩០ គ្រួសារ ក្នុងឃុំចំនួន៣ នៅស្រុកកងមាស សម្រាប់ការប្រើប្រាស់ទឹកស្រោចស្របដំណាំស្រូវប្រាំង ១១០ហិកតា និងស្រូវវស្សា ៣២០ហិកតា រួមជាមួយដីដាំដំណាំរួមផ្សំ ៥០ហិចតាទៀត។
ឯកឧត្តមរដ្ឋលេខាធិការ ក៏បានផ្ដាំផ្ញើដល់បងប្អូនប្រជាពលរដ្ឋ បន្ទាប់ពីទទួលបានសមិទ្ធផលថ្មីនេះ សូមចងក្រងជាសហគមន៍ កសិករប្រើប្រាស់ទឹក ធ្វើយ៉ាងណាមានកម្មវិធីដាំដុះឲ្យបានច្បាស់លាស់ ចែករំលែកគ្នាប្រើប្រាស់ ឱ្យបានគ្រប់ៗគ្នា។
ក្នុងឱកាសសំណេះសំណាលជាមួយប្រជាពលរដ្ឋនោះ ឯកឧត្ដម អ៊ុន ចាន់ដា អភិបាលខេត្តកំពង់ចាម ក៏បានលើកឡើងថា៖ ប្រព័ន្ធធារាសាស្ត្រនេះ គឺជាសមិទ្ធផលប្រវត្តិសាស្ត្រ សម្រាប់ឃុំព្រែកក្របៅ ដែលអាចស្រោចស្រពដំណាំទាំងរដូវប្រាំង និងរដូវវស្សាបានប្រមាណជាង 400ហិកតា។
ដូច្នេះសូមបងប្អូនប្រជាកសិករយើង ខិតខំប្រឹងប្រែងក្នុងការដាំដុះ បង្ករបង្កើនផលប្រកបដោយសមធម៌ ទទួលបានផលប្រយោជន៍ស្មើៗគ្នា ដើម្បីជាការចូលរួមលើកកម្ពស់ កម្រិតជីវភាពរបស់ប្រជាកសិករយើងទាំងអស់គ្នា។
ឯកឧត្ដមអភិបាលខេត្ត បានបន្តបញ្ជាក់ទៀតថា៖ សមិទ្ធផលដែលរដ្ឋាភិបាលបានប្រគល់ជូននាពេលនេះ គឺជាមូលដ្ឋានក្នុងការជំរុញឲ្យបងប្អូនប្រជាកសិករយើង ខិតខំប្រឹងប្រែង ឈានឆ្ពោះទៅរំដោះខ្លួនពីភាពក្រីក្រ ពិសេសចំពោះអ្នកដែលមានជីវភាពធូរធារហើយ ត្រូវប្រឹងប្រែងបន្តទៀត ខិតខំបង្ករបង្កើនផល និងបង្កើនមុខរបរផ្សេងៗ ដើម្បីឲ្យខ្លួនកាន់តែមានជីវភាពធូរធារជាងមុនទៀត៕
