រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា មានប្រសាសន៍ថា “យុវជនងាយនឹង ទទួលឥទ្ធពលពីព័ត៌មានក្លែងក្លាយខ្លាំងបំផុត”.
(ភ្នំពេញ) ៖ យុវជន ងាយប្រឈមនឹងទទួលបានព័ត៌មានក្លែងក្លាយ បំផុត ដែលព័ត៌មានក្លែងក្លាយទាំងនោះមានដូចជា ការញុះញុង ធ្វើអោយអសណ្តាប់ធ្នាប់ក្នុងសង្គមជាដើម ។ នេះជាប្រសាសន៍ របស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន នៅក្នុង សន្និសីទសារព័ត៌មាន ស្តីពី ការអនុវត្តយុទ្ធនាការ «និយាយថាទេ ចំពោះព័ត៌មានក្លែងក្លាយ!» ដែលបានរៀបចំឡើងកាលពីរសៀល ថ្ងៃទី៣១ ខែមីនា ឆ្នាំ ២០២៥ ម្សិលមិញ នៅទីស្តីការក្រសួងព័ត៌មាន ។
ឯកឧត្តម រដ្ឋមន្ត្រី បានមានប្រសាសន៍ថា ព័ត៌មានក្លែងក្លាយ បាន ក្លាយជាបញ្ហាប្រឈមមួយនៅលើបណ្តាញសង្គម ដែលវាបង្ហាញពី សកម្មភាព ញុះញង់ លាបពណ៌មិនល្អដល់សង្គម ក្នុង ចេតនាទាញយកផលប្រយោជន៍ផ្ទាល់ខ្លួន ដូចជាផ្នែកអាជីវកម្ម និង នយោបាយ ជាដើម ។ ហើយស្របពេលដែលប្រព័ន្ធ ផ្សព្វផ្សាយទំនើប (ឌីជីថល) កាន់តែរីកចម្រើន ទៀតនោះ យុជន គឺជាក្រុមមនុស្ស ដែលងាយនឹងទទួលឥទ្ធិពលពីព័ត៌មានក្លែងក្លាយ ទាំងនោះបំផុត ។
ឯកឧត្តម នេត្រ ភក្ត្រា បានបន្តថា ដូច្នេះហើយ ក្រសួងព័ត៌មាន នឹងអនុវត្តយុទ្ធនាការ «និយាយថាទេ ចំពោះព័ត៌មានក្លែងក្លាយ!» ដែលចាប់ផ្តើមបើកជាផ្លូវការណ៍នៅថ្ងៃទី ០១ ខែមេសា ឆ្នាំ ២០២៥ ក្នុងគោលបំណងផ្លាស់ប្តូរឥរិយាបទរបស់ប្រជាជន ដែល ជាអ្នកប្រើប្រាស់បណ្តាញទំនាក់ទំនងសង្គម និងប្រព័ន្ធផ្សព្វផ្សាយ ទំនើប ដើម្បីទប់ស្កាត់ការរីកសាយភាយនូវព័ត៌មានក្លែងក្លាយក្នុង សង្គមកម្ពុជា ។
នៅក្នុងឱកាសនោះដែរ ឯកឧត្តម រដ្ឋមន្ត្រីក្រសួងព័ត៌មាន បាន បង្ហាញថា អ្នកសារព័ត៌មាន និងអ្នកបង្កើតមាតិការ គឺជាកម្លាំង ចលករដ៏សំខាន់មួយ ក្នុងការបង្ក្រាបព័ត៌មានក្លែងក្លាយ ហើយ តាមរយៈយុទ្ធនាការ «និយាយថាទេ ចំពោះព័ត៌មានក្លែងក្លាយ!» យុវជន ក៏ដូចជាអ្នកប្រើប្រាស់បណ្តាញសង្គមទូទៅ នឹងទទួលបាន ចំណេះដឹងដែលជាមូលដ្ឋានគ្រឹះដើម្បីអាចផ្ទៀងផ្ទាត់បែងចែករវាង ព័ត៌មានពិត និងក្លែងក្លាយ ៕
ផ្សាយ:ថ្ងៃទី១ ខែមេសា ឆ្នាំ២០២៥
ប្រភពនិងរូបភាព ៖ ក្រសួងព័ត៌មាន
ដោយ:និពន្ធនាយករងអង្គភាពអាស៊ានដេលី
សៅ វាសនា(Harry VS)
