រដ្ឋបាលក្រុងព្រះសីហនុ ចេញសេចក្តីជូនដំណឹង ស្តីពី ការផ្អាកធ្វើចរាចរណ៍យានជំនិះគ្រប់ប្រភេទជាបណ្តោះអាសន្ន នៅលើកំណាត់ផ្លូវលេខ៥០០ (វិថីអូរឈើទាល) មានទីតាំងស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ
(ក្រុងព្រះសីហនុ): រដ្ឋបាលក្រុងព្រះសីហនុ មានកិត្តិយសសូមគោរពជម្រាបជូនដំណឹងដល់ ឯកឧត្តម លោកជំទាវ លោកឧកញ៉ា លោក លោកស្រី អ្នកនាងកញ្ញា សាធារណជន និងបងប្អូនប្រជាពលរដ្ឋទាំងអស់ មេត្តាជ្រាបថា ក្នុងឱកាសពិធីបុណ្យ ចូលឆ្នាំថ្មីប្រពៃណីជាតិខាងមុខនេះនៅតាមបណ្តារាជធានី ខេត្ត ទូទាំងប្រទេស នឹងមានការរៀបចំសង្ក្រាន្ត ល្បែងប្រជាប្រិយ និងកម្មវិធីកម្សាន្តផ្សេងៗ ដើម្បីទាក់ទាញភ្ញៀវទេសចរជាតិ-អន្តរជាតិ។ ដោយឡែកក្រុងព្រះសីហនុ ក៏មានការរៀបចំ សង្ក្រាន្ត ល្បែងប្រជាប្រិយ និងកម្មវិធីកម្សាន្តផ្សេងៗ ចំនួន ០២ទីតាំងផងដែរ រួមមាន ទីតាំងទី១ សង្ក្រាន្តអូរត្រេះ ស្ថិតនៅ បណ្តោយឆ្នេរអូរត្រេះ(ចន្លោះបន្ទប់ទឹកសាធារណៈទី៥ និងទី៦) ធ្វើឡើងនៅថ្ងៃទី៨ ខែមេសា ឆ្នាំ២០២៥ និងទីតាំងទី២ សង្ក្រាន្តអូរឈើទាល ស្ថិតនៅចំណុចខាងមុខភោជនីយដ្ឋាន អិន១ តាក់ស៊ី លើកំណាត់ផ្លូវលេខ ៥០០ (វិថីអូរឈើទាល) ធ្វើឡើងចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៥។
ដើម្បីបង្កលក្ខណៈងាយស្រួលដល់ការរៀបចំសង្ក្រាន្ត ល្បែងប្រជាប្រិយ និងកម្មវិធីកម្សាន្តផ្សេងៗ និងដើម្បីឱ្យ កម្មវិធីប្រព្រឹត្តទៅប្រកបដោយភាពសប្បាយរីករាយ សន្តិសុខ សុវត្ថិភាព រដ្ឋបាលក្រុងព្រះសីហនុ សូមផ្អាកការធ្វើ ចរាចរណ៍យានជំនិះគ្រប់ប្រភេទជាបណ្តោះអាសន្ន នៅលើកំណាត់ផ្លូវលេខ ៥០០ (វិថីអូរឈើទាល) ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ តាមកាលបរិច្ឆេទ និងពេលវេលា ដូចខាងក្រោម៖
ចាប់ពីថ្ងៃទី៤ ដល់ថ្ងៃទី៥ ខែមេសា ឆ្នាំ២០២៥ ផ្អាកការធ្វើចរាចរណ៍ ពេលព្រឹកចាប់ពីម៉ោង ០៧:០០នាទី ដល់ម៉ោង ១១:០០នាទី និងពេលរសៀលចាប់ពីម៉ោង ១៣:០០នាទី ដល់ម៉ោង ១៧:០០នាទី ដើម្បីធ្វើការ រៀបចំ តុបតែង ទីតាំងសង្ក្រាន្ត ល្បែងប្រជាប្រិយ និងកម្មវិធីកម្សាន្តផ្សេងៗ
– ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៥ ផ្អាកការធ្វើចរាចរណ៍ចាប់ពីម៉ោង ១៤:០០នាទីរសៀល ដល់ម៉ោង ២១:០០នាទីយប់ ដើម្បីដំណើការការលេងកម្សាន្តក្នុងកម្មវិធីសង្ក្រាន្ត លេងល្បែងប្រជាប្រិយ និង កម្មវិធីកម្សាន្តផ្សេងៗទៀត។
អាស្រ័យដូចបានគោរពជម្រាបជូនខាងលើ សូមឯកឧត្តម លោកជំទាវ លោកឧកញ៉ា លោក លោកស្រី អ្នកនាងកញ្ញា សាធារណជន និងបងប្អូនប្រជាពលរដ្ឋទាំងអស់ មេត្តាជ្រាបជាព័ត៌មាន។
ផ្សាយ:ថ្ងៃទី៣ ខែមេសា ឆ្នាំ២០២៥
ដោយ:និពន្ធនាយករងអង្គភាពអាស៊ានដេលីប្រចាំខេត្តព្រះសីហនុ
សៅ វាសនា(Harry VS)
