លោក សាមុត សុធារិទ្ធ អភិបាលរងនៃគណអភិបាលខេត្តព្រះសីហនុបានអញ្ជើញចូលរួមដឹកនាំក្នុងអង្គកិច្ចប្រជុំ ស្តីពី ការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងខេត្តព្រះសីហនុ នាឱកាសបុណ្យចូលឆ្នាំប្រពៃណីជាតិដែលនឹងខិតចូលមកដល់នាពេលឆាប់ៗខាងមុខនេះ.
(ខេត្តព្រះសីហនុ): លោក សាមុត សុធារិទ្ធ អភិបាលរងនៃគណអភិបាលខេត្តព្រះសីហនុ នៅរសៀលថ្ងៃ០៣ ខែមេសា ឆ្នាំ២០២៥ នេះ បានអញ្ជើញចូលរួមដឹកនាំក្នុងអង្គកិច្ចប្រជុំ ស្តីពី ការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងខេត្តព្រះសីហនុ នាឱកាសបុណ្យចូលឆ្នាំប្រពៃណីជាតិដែលនឹងខិតចូលមកដល់នាពេលឆាប់ៗខាងមុខនេះ នៅសាលប្រជុំក្រុមប្រឹក្សាខេត្តជាន់ទី១ ស្ថិតក្នុងសង្កាត់១ ក្រុងព្រះសីហនុ ដោយមានការអញ្ជេីញចូលរួមពីសំណាក់ ឯកឧត្តម លោកជំទាវ អភិបាលរងក្រុង/ស្រុក តំណាងកងកម្លាំងប្រដាប់អាវុធទាំងបីប្រភេទ និងមន្រី្តរដ្ឋបាលខេត្តជាច្រេីនរូបទៀត.
លោក សាមុត សុធារិទ្ធ អភិបាលរង នៃគណអភិបាលខេត្តព្រះសីហនុ បានមានប្រសាសន៍ថា ការថែរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈក្នុងខេត្តព្រះសីហនុ នាឱកាសបុណ្យចូលឆ្នាំប្រពៃណីជាតិខាងមុខនេះមានសារ:សំខាន់បំផុតគឺ ផ្តល់ភាពកក់ក្តៅជូនភ្ញៀវទេសចរ(ទាំងភ្ញៀវជាតិ-អន្តរជាតិ)ដែលមកកំសាន្តនៅតាមរមណីយដ្ឋានទេសចរណ៍នានា ក្នុងតំបន់ទាក់ទាញទេសចរណ៍ តំបន់ឆ្នេរ និងកោះនានា នៅទូទាំងខេត្ត ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ចំនួន៣ថ្ងៃ គិតចាប់ពីថ្ងៃទី១៤-១៦ ខែមេសា ឆ្នាំ២០២៥។
កិច្ចប្រជុំផ្តោតសំខាន់ ការយកចិត្តទុកដាក់ប្រមូលព័ត៌មានពាក់ព័ន្ធសភាពការណ៍សន្តិសុខ សណ្តាប់ធ្នាប់សាធារណៈ ពិសេស ភ្ជាប់ឱ្យបាននូវឧបាយកល សកម្មភាពបង្កអសន្តិសុខ ឬការញុះញង់បង្កសង្គ្រាមចិត្តសាស្ត្រធ្វើឱ្យ មានចលាចលសង្គមសំដៅម្ចាស់ការចាត់វិធានការ បង្ការ ទប់ស្កាត់ឱ្យមានប្រសិទ្ធភាព។
ចាត់វិធានការការពារសន្តិសុខ សណ្តាប់ធ្នាប់ នៅតាមទីវត្តអារាម សាលារៀន និងរមណីយដ្ឋាន នានា ដែលមានរៀបចំពិធីជួបជុំ ឬពិធីសង្ក្រាន្តលេងល្បែងប្រជាប្រិយផ្សេងៗ ដោយយកចិត្តទុកដាក់ បង្ការ ទប់ស្កាត់មិនឱ្យមានបទល្មើសព្រហ្មទណ្ឌគ្រប់ប្រភេទ ជាពិសេសសកម្មភាពបង្កការអុកឡុក ដោយជនទំនើង និងត្រូវរៀបចំសណ្តាប់ធ្នាប់ឱ្យបានល្អប្រសើរ។ យកចិត្តទុកដាក់រៀបចំសណ្តាប់ធ្នាប់ចរាចរណ៍ បង្ការភាពកកស្ទះ និងបង្កើនការរឹតបន្តឹងការអនុវត្ត ច្បាប់ចរាចរណ៍ផ្លូវគោក សំដៅកាត់បន្ថយគ្រោះថ្នាក់ចរាចរណ៍ យកចិត្តទុកដាក់ត្រួតពិនិត្យចំពោះ ការធ្វើដំណើរតាមផ្លូវទឹក ដើម្បីបង្កលក្ខណៈឱ្យប្រជាពលរដ្ឋធ្វើដំណើរទៅលេងស្រុកកំណើត ទៅធ្វើ បុណ្យដាក់ទាន ឬទៅកម្សាន្តតាមតំបន់រមណីយដ្ឋាន និងកោះនានា ប្រព្រឹត្តទៅដោយក្តីសប្បាយ រីករាយ និងមានសុវត្ថិភាព។
ត្រូវសហការជាមួយអាជ្ញាធរដែនដី រំលឹកដាស់តឿនប្រជាពលរដ្ឋឱ្យប្រុងប្រយ័ត្នចំពោះអគ្គិភ័យ ជាពិសេសការអុចទៀនធូបនៅពេលសែនព្រេន ភ្លើងចង្ក្រាន ចរន្តអគ្គិសនី គ្រឿងងាយឆេះ ដោយ ត្រូវប្រមូលផ្តុំកម្លាំង និងមធ្យោបាយប្រចាំការ ដើម្បីត្រៀមចេញអន្តរាគមន៍ពន្លត់ និងសង្គ្រោះ ហេតុការណ៍អគ្គិភ័យ ដែលអាចកើតឡើងជាយថាហេតុ។
យកចិត្តទុកដាក់ផ្សព្វផ្សាយទប់ស្កាត់ការលេងល្បែងស៊ីសងខុសច្បាប់គ្រប់ប្រភេទ។
យកចិត្តទុកដាក់ទប់ស្កាត់ការហូបគ្រឿងស្រវឹងហើយបើកបរ ដែលអាចបង្កគ្រោះថ្នាក់ជាយថាហេតុ។
យកចិត្តទុកដាក់ទប់ស្កាត់ការលេងល្បែងមិនគប្បី បង្កគ្រោះថ្នាក់ជាយថាហេតុដូចជា ការគប់ថង់ទឹក ឬវត្ថុរឹង ឬទឹកកខ្វក់ ការលេងប៉ាតម្សៅ ឬធ្យូង ឬខ្លាញ់ដោយលក្ខណៈកេងចំណេញ ឬលួចបន្លំ ខុស ប្រពៃណីទំនៀមទំលាប់ ដ៏ល្អផូរផង់របស់ជាតិ។
ត្រូវយកចិត្តទុកដាក់បង្កើនការក្តាប់សភាពការណ៍ពាក់ព័ន្ធសន្តិសុខ សណ្តាប់ធ្នាប់សង្គម ជាពិសេស សកម្មភាពភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ឧបាយកល សកម្មភាពប៉ុនប៉ងបង្កចលាចល សង្គម និងសកម្មភាពល្មើសផ្សេងៗទៀត ដើម្បីចាត់វិធានការបង្ការ ទប់ស្កាត់ និងបង្ក្រាបប្រកបអោយទាន់ពេល.
ដោយឡែកក្នុងកិច្ចប្រជុំក៏មានការកែប្រែ កាត់បន្ថយ និងបន្ថែម នូវចំនួនកងកម្លាំងប្រដាប់អាវុធដែលប្រចាំការតាមគោលដៅដែលបានគ្រោងទុកផងដែរ.
ជាក្រោយលោក សាមុត សុធារិទ្ធ អភិបាលរងខេត្ត នៃគណ:អភិបាលខេត្តព្រះសីហនុក៏បានថ្លែងអំណរគុណដល់ ឯកឧត្តម លោកជំទាវ អភិបាលរងក្រុង/ស្រុក តំណាងកងកម្លាំងប្រដាប់អាវុធទាំងអស់ និងមន្ត្រីសាលាខេត្តដែលបានចូលរួមកិច្ចប្រជុំរៀបចំផែនការនេ និងស្នេីអោយគ្រប់ស្ថាប័នកងកម្លាំងពាក់ពន្ធត្រូវត្រៀមតថយន្តពន្លត់អគ្គីភ័យ និងរថយន្តពេទ្យគ្រប់ពេលវេលា.
ផ្សាយ:ថ្ងៃទី០៣ ខែមេសា ឆ្នាំ២០២៥
ដោយ:និពន្ធនាយករងអង្គភាពអាស៊ានដេលីប្រចាំខេត្តព្រះសីហនុ
សៅ វាសនា(Harry VS)
