សម្តេចមហាបវរធិបតី ហ៊ុន ម៉ាណែត នាយក រដ្ឋមន្ត្រី នៃព្រះរាជាណាចក្រកម្ពុជា និង ឯកឧត្តម ឧត្តមសេនីយ៍ឯក Cao Qingfeng នាយរងសេនាធិការចម្រុះ នៃសេនាធិការដ្ឋាន គណៈកម្មការយោធាមជ្ឈឹម អញ្ជើញជាអធិបតី ក្នុងពិធីសម្ពោធសមិទ្ធផលទំនើបកម្មមូលដ្ឋាន សមុទ្ររាម និងមជ្ឈមណ្ឌលភស្តុភារ និង ហ្វឹកហ្វឺនរួមគ្នាកម្ពុជា-ចិន ផែរាម លើផ្ទៃដីសរុប ៨៧ហិកតា ស្ថិតនៅភូមិអុង សង្កាត់រាម ក្រុង កំពង់សោម ខេត្តព្រះសីហនុ នាព្រឹកថ្ងៃទី០៥ ខែមេសា ឆ្នាំ២០២៥។
(ខេត្តព្រះសីហនុ): សម្តេចធិបតី នាយករដ្ឋមន្ត្រី: ការកសាងឡើងនូវមជ្ឈមណ្ឌលភស្តុភារ និងហ្វឹកហ្វឺនរួមគ្នា កម្ពុជា ចិន-ផែរាម ជាការពង្រឹងហេដ្ឋារចនាសម្ព័ន្ធ នឹងធ្វើ ទំនើបកម្មពង្រឹងសមត្ថភាពកងទ័ពជើងទឹកកម្ពុជា ដែលធានា ដល់កិច្ចការពារជាតិប្រកបដោយប្រសិទ្ធភាព ស្របតាម រដ្ឋធម្មនុញ្ញនៃព្រះរាជាណាចក្រកម្ពុជា។ ការធ្វើទំនើបកម្ម មូលដ្ឋានសមុទ្ររាម កម្ពុជានឹងមានសមត្ថភាពកើនឡើងមួយ កម្រិតទៀត ក្នុងការគ្រប់គ្រងសភាពការណ៍ក្នុងដែនសមុទ្រ កម្ពុជា ដើម្បីបង្ការ ការពារ ទប់ស្កាត់ និងឆ្លើយតបទៅនឹង ឧបទ្ទវហេតុនានាបានទាន់ពេលវេលា និងមានប្រសិទ្ធភាព និងមានឱកាសកាន់តែទូលំទូលាយនៅក្នុងកិច្ចសហប្រតិបត្តិ ការផ្នែកសន្តិសុខលំហសមុទ្រជាមួយដៃគូអន្តរជាតិ និងក្នុង ក្របខណ្ឌតំបន់ ស្របតាមគោលនយោបាយជាតិ និង យុទ្ធសាស្ត្រជាតិស្តីពីសន្តិសុខលំហសមុទ្ររបស់កម្ពុជា។
សម្តេចធិបតី នាយករដ្ឋមន្ត្រី៖ «មូលដ្ឋានរាម គឺស្ថិតនៅក្រោមការគ្រប់គ្រងរបស់កម្ពុជាតែមួយគត់ គ្មានចំណែកណាត្រូវ បានកាត់ទៅដាក់ឱ្យស្ថិតនៅក្រោមការគ្រប់គ្រងរបស់កងទ័ពណានោះឡើយ»
សម្តេចធិបតី នាយករដ្ឋមន្ត្រី៖ «បន្ទាប់ពីពិធីនេះហើយ កម្ពុជាស្វាគមន៍រាល់ភាគីមិត្តទាំងអស់ដែលមានបំណងធ្វើសមយុទ្ធរួមគ្នានៅមូលដ្ឋានសមុទ្ររាមនេះ»៕
សម្តេចធិបតី នាយករដ្ឋមន្ត្រី៖ «ខ្ញុំប្រកាសជាឱឡារិកថា រាជរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជា នឹងមិនអនុញ្ញាតឲ្យប្រទេសណាមួយដាក់មូលដ្ឋានកងទ័ពនៅកម្ពុជានោះឡើយ មិនថាអតីកាល ថ្ងៃនេះ ថ្ងៃស្អែក ឬទៅថ្ងៃអនាគត»៕
ផ្សាយ: ថ្ងៃទី០៥ ខែមេសា ឆ្នាំ២០២៥
រូបថត:STPM
ដោយ:និពន្ធនាយករងអង្គភាពអាស៊ានដេលីប្រចាំខេត្តព្រះសីហនុ
សៅ វាសនា(HarryVS)
