អ្នកវិនិយោគិនក្នុងស្រុកគ្រោងនឹងបោះទុនប្រមាណជា ១៨០ លានដុល្លារ ដេីម្បីបង្កើតតំបន់សេដ្ឋកិច្ចពិសេសមួយផ្សេងទៀត នៅលេីទឹកក្រុងកំពង់សោម នៃខេត្តព្រះសីហនុ.
(ខេត្តព្រះសីហនុ):យោងតាមប្រសាសន៍របស់លោក ឃាង ភារម្យ នាយកទីចាត់ការផែនការវិនិយោគ និងជាអ្នកនាំពាក្យសាលាខេត្តព្រះសីហនុ បានថ្លែងកាលពីថ្ងៃទី៤ ខែមេសា ឆ្នាំ២០២៥ នេះថាក្រុមការងារអន្តរក្រសួងដឹកនាំដោយមន្ត្រីនៃក្រុម ប្រឹក្សាអភិវឌ្ឍន៍វិនិយោគកម្ពុជា (CDC) បានចុះពិនិត្យសំណើរសុំ បង្កើតតំបន់សេដ្ឋកិច្ចពិសេសមួយកន្លែងដែលមានទីតាំងស្ថិត នៅភូមិស្មាច់ដែង សង្កាត់រាម និងភូមិអូរតាសេក សង្កាត់អូរ ឧកញ៉ាហេង ក្រុងកំពង់សោម ខេត្តព្រះសីហនុ។ លោក ថាតាមរយៈការចុះត្រួតនិត្យនេះ ក្រុមហ៊ុននឹងធ្វើការចាប់ផ្ដើមសាងសង់នាពេលដ៏ខ្លីខាងមុខនេះ។លោកថាសម្រាប់ ទីតាំងដែលស្នើសុំនេះគឺនៅលើផ្ទៃដីទំហំ ប្រមាណជា ៣៩១ហិកតា ហើយសម្រាប់ការវិនិយោគនេះគឺជា វិនិយោគដោយវិនិយោគិនក្នុងស្រុក ខណៈបច្ចុប្បន្នតំបន់សេដ្ឋកិច្ចពិសេសនៅក្នុងខេត្តព្រះសីហនុដែលទទួលបានការអនុញាតិពីរាជរដ្ឋាភិបាលគឺមាន១៣តំបន់ ក្នុងនោះ៥តំបន់កំពុងដំណើការយ៉ាងសកម្ម។
គំរោងអភិវឌ្ឍន៍មួយនេះ ជារបស់អ្នកវិនិយោគិនក្នុងស្រុកបានបោះទុនចំនួន១៨០ លានដុល្លារ ក្នុងការសាងសង់តំបន់សេដ្ឋកិច្ចពិសេសថ្មីមួយទៀតនៅខេត្តព្រះសីហនុ ដើម្បីចាប់យកឱកាសនៃលំហូរទុនវិនិយោគដោយផ្ទាល់ពីក្រៅ ប្រទេស (FDI) ខណៈរដ្ឋាភិបាលបានដាក់ទិសដៅក្នុងការប្រែក្លាយខេត្តមាត់សមុទ្រមួយនេះទៅជាតំបន់សេដ្ឋកិច្ចពិសេសពហុបំណងដែលបម្រើជាទិសដៅសេដ្ឋកិច្ចដ៏រស់រវើកនៅក្នុងតំបន់។
លោកក៏បានបញ្ជាក់ថា កាលពីថ្ងៃទី៤ ខែមីនា ឆ្នាំ២០២៥ កន្លង ទៅនេះ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានជួបជាមួយវិនិយោគិននៃសម្ព័ន្ធក្រុមហ៊ុន East Group ដឹកនាំដោយ អ្នកឧកញ៉ា លី សេងឃាង ប្រធានក្រុម ប្រឹក្សាភិបាល និង លោកឧកញ៉ា ណាង សុធី អំពីគម្រោង ស្នើសុំបង្កើតតំបន់សេដ្ឋកិច្ចពិសេសរបស់ សម្ព័ន្ធក្រុមហ៊ុន East Group ដែលមានទីតាំងស្ថិតនៅក្នុងស្រុកព្រៃនប់ ខេត្ត ព្រះសីហនុ។តាមរយៈជំនួបពិភាក្សាការងារនេះដែរ ប្រធានក្រុមប្រឹក្សាភិបាល ទាំងពីរបានស្នើសុំការចង្អុលបង្ហាញពី លោកឧបនាយករដ្ឋមន្ត្រី ក៏ដូចជាថ្នាក់ដឹកនាំជំនាញ សំដៅធ្វើឱ្យគម្រោងស្នើសុំបង្កើត តំបន់សេដ្ឋកិច្ចពិសេសមួយនេះ អាចប្រព្រឹត្តទៅបានដោយរលូន ពិសេស មានអនុលោមភាពតាមច្បាប់ និងបទដ្ឋានគតិយុត្តពាក់ ព័ន្ធគ្រប់ប្រការ៕
ផ្សាយ:ថ្ងៃទី៥ ខែមេសា ឆ្នាំ២០២៥
ប្រភព:លោក ឃាង ភារម្យអ្នកនាំពាក្យសាលាខេត្ត
ដោយ:និពន្ធនាយករងអង្គភាពអាស៊ានដេលីប្រចាំខេត្តព្រះសីហនុ
សៅ វាសនា(HarryVS)
