កាលពីថ្ងៃទី ១៤ ខែកញ្ញា ឆ្នាំ ២០២១ កន្លងទៅ អ្នកគាំទ្រមានការភ្ញាក់ផ្អើលម្ដងហើយ ព្រមទាំងមានការបារម្ភខ្លាំងពីតារាសម្ដែងប្រុសរូបសង្ហា អ៊ុន សិទ្ធា បន្ទាប់ពីទទួលដំណឹងថា លោកធ្លាក់ខ្លួនឈឺខ្លាំង និង មានជំងឺជាច្រើនមុន គឺជំងឺរលាកក្រពះ ពោះវៀន គ្រុនឈាម និង ជំងឺគ្រុនចាញ់ ដែលកំពុងសម្រាកព្យាបាលនៅមន្ទីរពេទ្យ។
អ្វីដែលកាន់តែធ្វើឱ្យអ្នកគាំទ្រភ្ញាក់ផ្អើល និង បារម្ភពីលោកខ្លាំងទៀត គឺរំលងបាន ៣ ថ្ងៃ មកដល់ថ្ងៃទី ១៧ ខែកញ្ញា ឆ្នាំ ២០២១ ក៏បានឃើញតារាប្រុសរូបនេះបង្ហោះសារ និង រូបភាពប្រាប់ដល់អ្នកគាំទ្រម្ដងទៀត ដែលជារូបភាពលោកដេកលើគ្រែស្ដូកស្ដឹងមានសភាពឈឺធ្ងន់ធ្ងរ ព្រមទាំងលោកបានប្រាប់ពីអាការរបស់លោកឱ្យដឹងទៀតថា ពេលជំងឺធ្វើទុក្ខម្ដងៗខ្លួនរបស់លោកញាក់ញ័រខ្លាំងពិបាកក្នុងខ្លួន ប៉ុន្តែលោកបានធូរស្បើយខ្លះហើយ។
ដោយឡែកស្រាប់តែ នៅថ្ងៃទី ២៣ ខែកញ្ញា ឆ្នាំ ២០២១ នេះ តារាសម្ដែងប្រុសរូបនេះ ក៏បានបង្ហោះសារ និង រូបភាពជាថ្មី ប្រាប់ពីស្ថានភាពជំងឺរបស់លោកនាពេលនេះដល់មហាជនអ្នកគាំទ្រ ដែលបានឱ្យដឹងថា ក្រោយលោកធ្លាក់ខ្លួនឈឺប៉ុន្មានថ្ងៃមកនេះ បានស្រកគីឡូអស់រហូតដល់ ៥ គីឡូឯណ្ណោះ មើលទៅមុខមាត់របស់លោកហាក់ស្លក់ ស្លេកស្លាំងខ្លាំង និង ស្គមជាងមុន ដែលកំពុងតែធ្វើឱ្យមហាជនអ្នកគាំទ្រកាន់តែបារម្ភ និង អាណិតដល់រូបលោកថែមទៀត។
នេះបើតាមការបង្ហោះរូបភាពភ្ជាប់ជាមួយសារដែលតារាប្រុសរូបនេះបានរៀបរាប់ថា៖ «ទិដ្ឋភាពខ្ញុំនៅពេលនេះ ស្រកអស់ ៥ គីឡូ សូមអ្នកទាំងអស់គ្នាថែរក្សាសុខភាពផង។ អរគុណអ្នកទាំងអស់គ្នាដែលបាន comments ផ្ញើសារជូនពរខ្ញុំរហូតមក សូមផ្ញើការស្រឡាញ់ជូនអ្នកទាំងអស់គ្នាផង»។ទន្ទឹមនឹងនោះ បន្ទាប់ពីទទួលដឹងពីស្ថានភាពជំងឺរបស់តារាសម្ដែងប្រុសរូបនេះហើយ មហាជនអ្នកគាំទ្រ ក៏ដូចជាសិល្បករ-ការិនីរួមអាជីពជាច្រើន បានបន្តការជូនពរដល់រូបលោកឱ្យឆាប់សះស្បើយផងដែរ៕
