ករណីហិង្សាបំផ្លិចបំផ្លាញទ្រព្យសម្បត្តិអ្នកសារព័ត៌មាន បង្កដោយមេបនល្បែង ពេលនេះសមត្ថកិច្ចពាក់ព័ន្ធកំពុងតែរក្សាភាពស្ងៀមស្ងាត់

ភ្នំពេញ៖ មេបនល្បែងស៊ីសងខុសច្បាប់ សង្វៀនជល់មាន់ និងអាប៉ោង ដុះស្លែមួយកន្លែងប្រចាំខណ្ឌមានជ័យ ឈ្មោះ ឆើត ដែលបានប្រព្រឹត្តអំពើហិង្សា និងបំផ្លិចបំផ្លាញទ្រព្យសម្បត្តិ អ្នកសារព័ត៌មាន ពេលនេះសមត្ថកិច្ចពាក់ព័ន្ធកំពុងតែរក្សាភាពស្ងៀមស្ងាត់។

ទីតាំងល្បែងស៊ីសងខុសច្បាប់ដុះស្លែរបស់ឈ្មោះ ឆើត បានបើកដំណើរការរៀងរាល់ថ្ងៃ ត្រង់ចំណុចក្នុងផ្ទះជនដៃដល់ដែលជាមេបនល្បែង ស្ថិតនៅសង្កាត់ស្ទឹងមានជ័យ២ ខណ្ឌមានជ័យ និងគ្មានការបង្ក្រាបពីសមត្ថកិច្ចក្នុងមូលដ្ឋាន ទើបឈានទៅដល់កើតនូវអំពើហិង្សាបំផ្លិចបំផ្លាញទ្រព្យសម្បត្តិអ្នកដទៃ!

ហើយលោក អ៊ុក បូនីន អធិការនគរបាលខណ្ឌមានជ័យ បែរជាសម្ងំស្ងៀមគ្មានចំណាត់ការបង្ក្រាបជនដៃដល់ ឈ្មោះឆើត ដែលជាមេបនល្បែង ហើយកន្លងមកមេបនល្បែងរូបនេះតែងតែធ្វើព្យុះភ្លៀង និងបង្កការក្តៅក្រហាយដល់ប្រជាពលរដ្ឋស្លូតត្រង់ (ពោលគឺ) ប្រមែប្រមូលផ្ដុំគ្នាលេងល្បែងស៊ីសងខុសច្បាប់យ៉ាងអណាធិបតេយ្យ។

យើងដឹងហើយថាល្បែងស៊ីសងទាំងនោះគឺជាដើមចម នៅពពួកចោរលួច ចោរប្លន់ ចោរឆក់ អំពើហិង្សា ភាពអសន្តិសុខសង្គម និងបទល្មើសផ្សេងទៀត គឺកើតចេញពីល្បែងស៊ីសងនេះហើយ។

គួរបញ្ជាក់ថា៖ កាលពីថ្ងៃទី២៦ ខែមីនា ឆ្នាំ២០២២ មានករណីហិង្សាបំផ្លិចបំផ្លាញទ្រព្យសម្បត្តិ បង្កដោយឈ្មោះឆើត ដែលជាជនដៃដល់ និងជាមេបនល្បែងដុះស្លែប្រចាំខណ្ឌមានជ័យ ។ រីឯសមត្ថកិច្ចវិញបានត្រឹមតែឈរមើល ដោយមិនខ្វល់ខ្វាយឃាត់ខ្លួនជនដៃដល់ ដែលជាមេបនល្បែងនិងប្រព្រឹត្តអំពើល្មើសច្បាប់ ដោយប្រើហិង្សាបំផ្លាញទ្រព្យសម្បត្តិអ្នកដទៃ (ពោលគឺ៖ កំពុងតែបណ្តែតបណ្ដោយឲ្យជនដៃដល់នៅក្រៅប្រព័ន្ធផ្លូវច្បាប់)

ដោយសារតែភាពអសកម្មរបស់សមត្ថកិច្ចខណ្ឌមានជ័យ ធ្វើឲ្យមហាជនជាច្រើនអស់ជំនឿទៅលើលោក អ៊ុក បូនីន អធិការនគរបាលខណ្ឌ ក្រោមហេតុផលថា៖ មេបនល្បែង ឈ្មោះ ឆើត ធ្វើព្យុះភ្លៀងយ៉ាងអណាធិបតេយ្យ និងបង្កហិង្សាបំផ្លិចបំផ្លាញទ្រព្យសម្បត្តិអ្នកដទៃយ៉ាងសាហាវព្រៃផ្សៃប៉ុណ្ណឹងហើយនៅមិនមានចំណាត់ការ (តើឲ្យប្រជាពលរដ្ឋសង្ឃឹមអ្វី)

ចំណែកឯលោក ស ថេត ស្នងការនគរបាលរាជធានីភ្នំពេញ ហាក់ដូចជាបណ្តែតបណ្ដោយឲ្យលោក អ៊ុក បូនីន អធិការនគរបាលខណ្ឌមានជ័យ ធ្វើអ្វីៗស្រេចតែអំពើចិត្ត (មានន័យថា) បទល្មើសហិង្សាបំផ្លិចបំផ្លាញទ្រព្យសម្បត្តិអ្នកដទៃដែលជាបទល្មើសព្រហ្មទណ្ឌ បង្កដោយមេបនល្បែងបានកើតឡើងនៅក្នុងមូលដ្ឋានបែរជាលោកអធិការខណ្ឌសម្ងំស្ងៀមដូចត្រូវថ្នាំសណ្ដំ៕