សមត្ថកិច្ចបញ្ជូនម្ចាស់ក្លិបខារ៉ាអូខេ សាច់អាំង រតនៈ ជាមួយនឹងបក្ខពួក ម្នាក់ទៀត ទៅតុលាការ ពាក់ព័ន្ធករណីជួញដូរគ្រឿងញៀន

ខេត្តបាត់ដំបង ៖ នៅរសៀលថ្ងៃទី២៦ ខែមេសា ឆ្នាំ២០២២នេះ សមត្ថកិច្ចខេត្តបាត់ដំបង នឹងបញ្ជូន ម្ចាស់ក្លិបខារ៉ាអូខេ សាច់អាំង រតនៈ ជាមួយនឹងបក្ខពួក ម្នាក់ទៀត ទៅតុលាការ ពាក់ព័ន្ធករណីជួញដូរគ្រឿងញៀន។ ចំណែកបុរសស្ត្រីចំនួន ១៩ នាក់ផ្សេងទៀត ដែលជាប់ពាក់ព័ន្ធប្រយោល ត្រូវនគរបាលជំនាញ អនុវត្ត វិធានការអប់រំ ណែនាំ និងធ្វើកិច្ចសន្យាបញ្ឈប់ រួចឲ្យវិលត្រឡប់ ទៅកាន់លំនៅដ្ឋានវិញ។

លោកវរសេនីយ៍ឯក សុខ និមល នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបាត់ដំបង បានប្រាប់ឲ្យដឹងថា ៖ជនសង្ស័យទាំងពីរនាក់ ឈ្មោះ ទុន សុភ័ក្ត្រ ភេទប្រុស អាយុ៤២ ឆ្នាំ រស់នៅក្នុងភូមិ១៣មករា សង្កាត់ព្រែកព្រះស្តេច ក្រុងបាត់ដំបង ជាមេការ និងជាអ្នកជួញដូរ រក្សាទុកគ្រឿងញៀនផ្ទាល់ និងម្នាក់ទៀត ឈ្មោះ ជា សុខមុន្នី ភេទប្រុស អាយុ៣៤ឆ្នាំ មានទីលំនៅ ភូមិរំចេក ៤ សង្កាត់រតនៈ ក្រុងបាត់ដំបង ខេត្តបាត់ដំបង ជាថៅកែ ជួលទីតាំងធ្វើអាជីវកម្ម ខារ៉ាអូខេ។

សមត្ថកិច្ចបានឱ្យដឹងថា ៖ ក្រោយការសាកសួរលម្អិត លើបុរស ស្ត្រី ចំនួន ២១ នាក់ សមត្ថកិច្ចជំនាញ បានកំណត់មុខ សញ្ញាល្មើស ចំនួន ពីរនាក់ បានពាក់ព័ន្ធផ្ទាល់ ក្នុងករណីរក្សាទុក និងជួញ ដូរគ្រឿង ញៀន នៅក្នុងក្លិបខារ៉ាអូខេ សាច់អាំង រតនៈ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ហើយនឹងនាំខ្លួន បញ្ជូនទៅសាលាដំបូងខេត្ត បាត់ដំបង នៅរសៀល ថ្ងៃទី២៦ ខែមេសា នេះ។

សមត្ថកិច្ចបន្តថា ៖ ក្នុងប្រតិបត្តិការបង្ក្រាប កម្លាំងចម្រុះ ដកហូត បាននូវវត្ថុតាង រួមមាន៖ ថ្នាំញៀនប្រភេទកេតាមីន (KETAMINE) ចំនួន ៣ ថង់ ទម្ងន់ ២,៧៧ ក្រាម និងថ្នាំញៀនប្រភេទ អិចស្តាស៊ី (MD MA) ចំនួន ៣ គ្រាប់ ទម្ងន់ ១,១១ ក្រាម ព្រមទាំងរថយន្តមួយគ្រឿងផងដែរ ម៉ាកតូយ៉ូតា កាមរី (ឆ្លាម) ពណ៌ឆ្លូញ ពាក់ស្លាកលេខ ភ្នំពេញ 2L-2501៕