អនុប្រធានាធិបតីវ័យ៦០ឆ្នាំរូបនេះ ចូលលេងប្រកួតអាជីពដំបូងក្នុងក្លឹបរបស់ខ្លួន តែងតាំងខ្លួនឯងជាប្រធានក្រុមទៀត
លោក Ronnie Brunswijk អនុប្រធានាធិបតីប្រទេស Suriname ដែលជាប្រទេសមួយនៅទ្វីបអាមេរិកខាងត្បូង បានចូលលេងប្រកួតអាជីពជាលើកដំបូងនៅក្នុងវ័យ៦០ឆ្នាំ ក្នុងក្លឹបរបស់លោកផ្ទាល់គឺក្លឹប Inter Moengotapoe ក្នុងការប្រកួតតទល់នឹងក្លឹប Olimpia ដែលជាក្លឹបមកប្រទេស Honduras ក្នុងក្របខ័ណ្ឌ CONCACAF League វគ្គ១៦ក្រុម ជើងទី១ កាលពីថ្ងៃទី២២ ខែកញ្ញា ឆ្នាំ២០២១ម្សិលមិញ។
នៅក្នុងការចូលរួមប្រកួតដំបូងក្នុងក្លឹបរបស់ខ្លួន លោកអនុប្រធានាធិបតីរូបនេះក៏បានតែងតាំងខ្លួនឯងជាប្រធានក្រុមរបស់ក្លឹបផងដែរ ដោយបានចូលលេងបាន៥៣នាទី និងឲ្យកូនប្រុសរបស់ខ្លួន Damian Brunswijkគឺជាកីឡាករនៅក្នុងក្លឹប Inter Moengotapoe ផ្ទាល់ចូលលេងជំនួសបន្ត។
ទោះជាមានវត្តមានពីលោកអនុប្រធានាធិបតី Ronnie Brunswijk ចូលលេង Inter Moengotapoe ដោយផ្ទាល់ក៏ខាងក្លឹប Olimpia មិនបន្ធូរបន្ថយជើងអ្វីដែរ ដោយស៊ុតគូប្រកួតរហូតទទួលលទ្ធផលឈ្នះ ៦-០ ឯណោះ។
បើតាម Givemesport ក្រោយចប់ការប្រកួតលោក Ronnie Brunswijk ក៏បានចូលទៅបន្ទប់ផ្លាស់សំលៀកបំពាក់ខាង Olimpia និងបានទៅចែកលុយក្រដាសសន្លឹក ១០០ ដុល្លារជាច្រើនទៅឲ្យគ្រូបង្គោល និងកីឡាករមកពីក្លឹបនោះផងដែរ។
បើយោងតាមការចុះផ្សាយរបស់ Marca លោកអនុប្រធានាធិបតីរូបនេះនឹងមិនអាចចូលរួមប្រកួតខាងលើជើងទី២បានទេ ដោយសារតែលោកត្រូវបានខាងស្ថាប័នប៉ូលិសឧក្រិដ្ឋកម្មអន្តរជាតិ Interpol តាមចាប់ខ្លួនពីបទជួញដូរគ្រឿងញៀន។ មិនតែប៉ុណ្ណោះប្រវត្តិរបស់លោកធ្លាប់ជាមេចោរប្លន់ធនាគារកាលពីយុវវ័យ ជាមេទ័ពព្រៃ ក៏ដូចជាឪពុករបស់កូនក្មេងប្រមាណ ៥០នាក់ផងដែរ៕