ភ្នំពេញ៖ បុរស ២នាក់ ទើបចេញពីលក់ម្ហូបអាហារ នៅម្តុំសណ្ឋាគារសុខា បើករថយន្តត្រលប់ទៅផ្ទះវិញ ក៏ងោកមួយភាំង រ៉េចង្កូតបុកចូលផ្ទះលក់ចាប់ហួយ ត្រូវទូកញ្ចក់ និងធុងទឹកកកក្លាសេភេសជ្ជៈ បណ្តាលអោយរងការខូចខាត និងខ្ទាតត្រូវស្ត្រីម្នាក់ របួសស្រាល។ ហេតុការណ៍នេះ កើតឡើង កាលពីវេលាម៉ោង ១ និង ២០នាទី រំលងអាធ្រាត្រ ឈានចូលថ្ងៃទី២៨ ខែកញ្ញា ឆ្នាំ២០២១ នៅតាមបណ្ដោយផ្លូវទន្លេសាប ចំណុចផ្ទះលក់ចាប់ហួយ យីហោ ពិសី លក់គ្រឿងទេស និងភេសជ្ជៈគ្រប់ប្រភេទ នៅក្នុងសង្កាត់ជ្រោយចង្វារ ខណ្ឌជ្រោយចង្វារ។ 
រថយន្ត បង្កម៉ាក visto ពណ៌ក្រហម ពាក់ស្លាកលេខ ភ្នំពេញ 2H-9502 បើកបរដោយតៃកុង ឈ្មោះ ចាន់ សៀវ អាយុ ៣៥ឆ្នាំ មុខរបរលក់គ្រឿងម្ហូបអាហារតាមផ្លូវ នៅម្តុំសណ្ឋាគារសុខា។
ស្ត្រីម្ចាស់ផ្ទះរងគ្រោះ បានប្រាប់ថា មុនកើតហេតុ គឺរូបគាត់ និងស្ត្រីម្នាក់ទៀត កំពុងអង្គុយជជែកគ្នាលេង ស្រាប់តែមានរថយន្តបង្កខាងលើ ធ្វើដំណើរតាមបណ្ដោយផ្លូវទន្លេសាប ទិសដៅពីត្បូង ទៅជើង ក្នុងល្បឿនលឿន រ៉េចង្កូត មកខាងស្តាំ បុកត្រូវទូកញ្ចក់ លក់គ្រឿងក្លែមមួយ នៅជាប់ផ្ទះគាត់ បណ្តាលអោយរលំបែក រងការខូចខាត និងបន្តបុករះធុងទឹកកកក្លាសេភេសជ្ជៈរបស់គាត់ចំនួន ៥ធុង និងទូកញ្ចក់លក់គ្រឿងម្ជូរ ១ បណ្តាលឲ្យខ្ទាតរងការខូចខាត និងខ្ទាតប៉ះពួកគាត់ទាំងពីរ បណ្តាលឲ្យរងរបួសស្រាល។
ចំណែកម្ចាស់រថយន្ត បានប្រាប់ថា មូលហេតុ ដែលគាត់បើករថយន្តបុករ៉ះចូលផ្ទះគេបែបនេះ មូលហេតុ គឺគាត់ងងុយគេង ងោកមួយភាំង ក៏ជ្រុលចង្កូតបុកតែម្តង។
បន្ទាប់ពីកើតហេតុ ម្ចាស់ផ្ទះរងគ្រោះ បានទាមទារសំណងជាទឹកប្រាក់ចំនួន ១២០០ដុល្លារ។ ចំណែក ម្ចាស់រថយន្ត បានសុំបញ្ចុះថ្លៃ និងព្រមសង ទៅតាមទំហំនៃការខូចខាត ដើម្បីបញ្ចប់រឿង នៅនឹងកន្លែងកើតហេតុ៕
