រាជធានីភ្នំពេញ ៖ រហូតមកទល់នាពេលនេះ រឿងរ៉ាវដ៏ក្រក្រើកក្នុងវិស័យសិល្បៈពាក់ព័ន្ធអ្នកនាង ខ្ញុង នៅមិនទាន់ស្ងប់រលកនៅឡើយទេ ខណៈពេលមានមហាជន និងអ្នកសិល្បៈមួយចំនួនបានចេញមករិះគន់លើតារាកំប្លែងរូបនេះ ដែលធ្វើអោយអាប់ឱនដល់អ្នកសិល្បៈស្រុកខ្មែរ។
ការលើកដៃសុំអង្វរពីមហាជនអោយជួយម្នាក់១ដុល្លារពីអ្នកនាង ខ្ញុង បានធ្វើអោយមហាជន ជាពិសេសអ្នកសិល្បៈជើងចាស់មួយចំនួនបានចាត់ទុកជារឿងមិនគប្បី ត្បិតអ្នកសិល្បៈជាមនុស្សមហាជន ពេលធ្លាក់ខ្លួនមិនគួរលើកដៃសុំគេបែបនេះឡើយ។
បញ្ហានេះ បានធ្វើអោយគេឈ្មោះដែលអ្នកនាង ខ្ញុង បានសាងក្នុងអាជីពសិល្បៈប៉ុន្មានឆ្នាំមកនេះបានធ្លាក់ស្ទើរដល់ចំណុចសូន្យ ហើយមហាជនមួយចំនួនអាចនឹងលែងគាំទ្រដល់ការសម្តែងរបស់នាងថែមទៀតផង។
យ៉ាងណាពាក់ព័ន្ធការបន្តអាជីពសម្តែងកំប្លែងទៀត ឬយ៉ាងណានោះ? លោក សុវណ្ណ រិទ្ធី ហៅតា វ៉ិចទ័រ បានអះអាងថា លោកមិនហ៊ានសម្រេចនោះឡើយ ពោលគឺអ្វីៗត្រូវចាំរង់ចាំការសម្រេចពីថ្នាក់ដឹកនាំរបស់ CTN។
លោក សុវណ្ណ រិទ្ធី ហៅតាវ៉ិចទ័រ ដែលជាអ្នកដឹកនាំកម្មវិធីកំសាន្ត និងកំប្លែងរបស់ស្ថានីយទូរទស្សន៍ CTN បានអះអាងប្រាប់កោះសន្តិភាពតាមសារអេឡិចត្រូនិចថា ចំណុចខាងលើនេះ លោកមិនទាន់ថាយ៉ាងម៉េចទេ គឺអាស្រ័យលើអ្នកគ្រប់គ្រងរបស់ CTN។ លោកបញ្ជាក់ថា សម្រាប់លោកគឺលោកនៅតែផ្តល់ឱកាសសម្រាប់កូនក្រុមកំប្លែងរបស់លោកគ្រប់ៗគ្នា បើទោះមានរឿងអ្វីកើតឡើងក៏ដោយ។
លោកថា លោកមានការសោកស្តាយនូវរឿងរ៉ាវដែលបានកើតឡើងលើអ្នកនាង ខ្ញុង ហើយលោកក៏មិនដឹងខាង CTN គេនឹងសម្រេចយ៉ាងម៉េចចំពោះនាងដែរ។ លោកតា វ៉ិចទ័រ លើកឡើថា នៅក្នុងអំឡុងពេលនេះ បើទោះបីជាលោកហៅនាង ខ្ញុង មកសម្តែងដូចធម្មតា លោកក៏មិនដឹងថា ខ្ញុង មកឬអត់? ព្រោះកំពុងមានរឿងចឹង។
លោកថា កម្មវិធីរបស់លោកបានរៀបចំរួចអស់ហើយ តែដល់ពេល ខ្ញុង មានរឿងចឹងកើតឡើង លោកក៏មិនទាន់គិតថា ត្រូវធ្វើយ៉ាងណាដែរ ព្រោះវាកើតឡើងភ្លាមៗពេក។ យ៉ាងណា បើតាមលោកតា វ៉ិចទ័រ ថា ក្នុងករណីនាង ខ្ញុង មិនបានមកសម្តែង ហើយលោកត្រូវផ្លាស់ប្តូរឬយ៉ាងណានោះ លោកនៅមិនទាន់គិតដល់នៅឡើយទេ ព្រោះលោកកំពុងរវល់កិច្ចការងារច្រើន។
យ៉ាងណាលោក នៅរង់ចាំមើលការសម្រេចពីអ្នកគ្រប់គ្រង CTN ជាមុនសិន ទើបលោកអាចសម្រេចជាក្រោយថា តើអនាគតនាង ខ្ញុង អាចបន្តសម្តែងនៅ CTN បានទៀត ឬមិនបានយ៉ាងណានោះ?៕
