តាមរយៈការផ្ដល់ដំណឹងពីនាយកដ្ឋានប្រឆាំងបទល្មើសបចេ្ចកវិទ្យា បានឱ្យដឹងថា កាលពីពេលថ្មីៗនេះ ក្រុមអ្នកស្រាវជ្រាវ MG បានបង្ហាញថា ពួកគេអាចធ្វើការកែច្នៃ ខ្សែសម្រាប់ភ្ជាប់ឧបករណ៍បច្ចេកវិទ្យា របស់ក្រុមហ៊ុន Apple មានដូចជាខ្សែប្រភេទ Lightning និង USB-C ដើម្បីលួចទាញយកទិន្នន័យ នៅពេលដែលអ្នកប្រើប្រាស់ វាយបញ្ចូលលេខសម្ងាត់ ឬ ព័ត៌មានផ្សេងៗ ។
ជាក់ស្ដែង ពួកគេបានឱ្យឈ្មោះខ្សែដែលបានកែច្នៃនេះថាខ្សែ OMG ហើយវាមានបង្កប់មកជាមួយនឹងបន្ទះឈីបតូចមួយ ដែលអាចបង្កើត Wi-Fi hotspot អាចឱ្យជនខិលខូច ភ្ជាប់ដើម្បីទាញយកទិន្នន័យ ។
តាមរយៈការកែច្នៃនេះ បានបង្ហាញឱ្យឃើញថា ទោះបីជាខ្សែប្រភេទ USB-C ដែលមិនមានទំហំធំក្ដី ក៏ក្រុមអ្នកស្រាវជ្រាវ អាចនៅតែធ្វើការកែច្នៃបន្ថែមបន្ទះឈីបបានទៀត ។ ដូច្នេះហើយ ដើម្បីសុវត្ថិភាពក្នុងការប្រើប្រាស់ឧបករណ៍បច្ចេកវិទ្យា លោកអ្នកគួរតែចៀសវាងប្រើខ្សែភ្ជាប់ដែលមាននៅទីសាធារណៈ ព្រោះជនខិលខូច អាចលួចបន្លំដាក់ខ្សែដែលបានកែច្នៃនៅទីនោះ ដើម្បីលួចទាញយកទិន្នន័យ នៅពេលដែលលោកអ្នកប្រើឧបករណ៍ទាំងនោះ ៕
ប្រភព ៖ នាយកដ្ឋានប្រឆាំងបទល្មើសបច្ចេកវិទ្យា