ស្រួលហើយ! Facebook កំពុងសាកល្បងដាក់មុខងារ Call សំឡេង និងវីដេអូ ក្នុងហ្វេសប៊ុកផ្ទាល់ មិនពិបាកចូល Messenger ទៀត

នាយកដ្ឋានប្រឆាំងបទល្មើសបច្ចេកវិទ្យា នៅរសៀលថ្ងៃទី ២៤ ខែសីហា ឆ្នាំ ២០២១ នេះ បានផ្ដល់ព័ត៌មានឱ្យបានដឹងថា ក្រុមហ៊ុនហ្វេសប៊ុក កំពុងសាកល្បងដាក់បញ្ចូលមុខងារ call តាមរយៈសំឡេង ឬ វីដេអូ ក្នុងកម្មវិធីហ្វេសប៊ុកវិញ ។ជាក់ស្ដែង កាលពីពេលថ្មីៗនេះ អ្នកប្រើប្រាស់នៅក្នុងសហរដ្ឋអាមេរិក និងប្រទេសមួយចំនួនទៀត អាចប្រើមុខងារ call តាមរយៈសំឡេង ឬ វីដេអូនៅក្នុងកម្មវិធីហ្វេសប៊ុក ដោយមិនចាំបាច់ចូលទៅក្នុងកម្មវិធី Messenger ។ ក្នុងនោះ បើតាមការបញ្ជាក់របស់ក្រុមហ៊ុន បានឱ្យដឹងថា ក្រុមហ៊ុនកំពុងតែសាកល្បងមុខងារនេះ ដើម្បីកាត់បន្ថយកុំឱ្យមានការផ្លាស់ប្ដូររវាងកម្មវិធីទាំងពីរច្រើនពេក ដែលអាចធ្វើឱ្យអ្នកប្រើប្រាស់ មានការធុញទ្រាន់ ។គួររំឭកផងដែរថា កាលពីឆ្នាំ ២០១៤ ក្រុមហ៊ុនហ្វេសប៊ុកបាន បំបែកមុខងារមួយចំនួនពីកម្មវិធីហ្វេសប៊ុក ដើម្បីបញ្ចូលទៅក្នុងកម្មវិធីថ្មីដែលមានឈ្មោះ Messenger ដែលអាចឱ្យអ្នកប្រើប្រាស់ផ្ញើសារ និង call ។ មូលហេតុដែលក្រុមហ៊ុនបានបំបែកកម្មវិធីនៅពេលនោះ គឺដើម្បីឱ្យការប្រើប្រាស់ កាន់តែមានភាពងាយស្រួល ហើយម្យ៉ាងវិញទៀត ក្រុមហ៊ុនក៏បានបន្ថែមមុខងារមួយចំនួនទៀតទៅក្នុងកម្មវិធីថ្មីនេះផងដែរ ។ជាងនេះទៅទៀត តាមការបញ្ជាក់ពីខាងនាយកដ្ឋានបានឱ្យដឹងថា ថ្មីៗនេះ ក្រុមហ៊ុនអាចនឹងបន្ថែមមុខងារផ្ញើសារទៅក្នុងកម្មវិធីហ្វេសប៊ុកផ្ទាល់ផងដែរ ដើម្បីទាក់ទាញអ្នកប្រើប្រាស់ពីកម្មវិធីផ្ញើសារផ្សេងៗទៀត មានដូចជា iMessage របស់ក្រុមហ៊ុន Apple ជាដើម ៕