សម្តេចតេជោ ហ៊ុន សែន ផ្ញើលិខិតថ្លែងអំណរគុណចំពោះអ្នកឧកញ៉ា គិត ម៉េង និងលោកជំទាវឧកញ៉ា ម៉ៅ ចំណាន ដែលបានបរិច្ចាគថវិកាចំនួន ៥០ម៉ឺនដុល្លារអាមេរិក ផ្ដល់ជូនមូលនិធិតេជោ ១២៥

ភ្នំពេញ៖ ប្រមុខនៃរាជរដ្ឋាភិបាលកម្ពុជា សម្តេចតេជោ ហ៊ុន សែន បានផ្ញើលិខិតថ្លែងអំណរគុណចំពោះអ្នកឧកញ៉ា គិត ម៉េង និងលោកជំទាវឧកញ៉ា ម៉ៅ ចំណាន ក្រុមហ៊ុន រ៉ូយ៉ាល់ គ្រុប ដែលបានបរិច្ចាគថវិកាចំនួន ៥០ម៉ឺនដុល្លារអាមេរិក ផ្ដល់ជូនមូលនិធិតេជោ ១២៥។

ក្នុងលិខិត សម្តេចតេជោ បានសរសេរថា “តាងនាមរាជរដ្ឋាភិបាលនៃព្រះរាជាណាចក្រកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅចំពោះ អ្នកឧកញ៉ា និងលោកជំទាវឧកញ៉ា ដែលបានបរិច្ចាគថវិកាចំនួន ៥០០ ០០០ (ប្រាំរយពាន់)ដុល្លារអាមេរិក ផ្ដល់ជូនមូលនិធិតេជោ ១២៥ សម្រាប់ចូលរួមចំណែកជួយសម្រួលដោះស្រាយដល់ជីវភាពនៃគណៈយុទ្ធមិត្តជំនាន់បម្រើកងទ័ពឆ្នាំ១៩៧៨។

សម្តេចតេជោ ហ៊ុន សែន បានសម្ដែងការកោតសរសើរដោយស្មោះ និងវាយតម្លៃខ្ពស់ចំពោះស្មារតីរួមចំណែកជាថវិកាដ៏មានអត្ថន័យរបស់អ្នកឧកញ៉ា និងលោកជំទាវឧកញ៉ា ដែលបានគិតគូរចំពោះសុខទុក្ខរបស់យុទ្ធជនក្នុងការលះបង់ តស៊ូ ពលីដើម្បីបុព្វហេតុជាតិមាតុភូមិ។

សូមបញ្ជាក់ថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កាលពីថ្ងៃទី២២ ខែមីនា ឆ្នាំ២០២៣ បានចេញសេចក្ដីសម្រេច ស្ដីពីការបង្កើតគណៈយុទ្ធមិត្ដជំនាន់បម្រើកងទ័ពឆ្នាំ ១៩៧៨។ តាមសេចក្ដីសម្រេច បានបញ្ជាក់ថា ត្រូវបានបង្កើតគណៈយុទ្ធមិត្តជំនាន់បម្រើកងទ័ពឆ្នាំ១៩៧៨ ហៅកាត់ថា «យ.ជ.ប.ទ» ដែលមានសមាសភាពដូចខាងក្រោម៖

១៖ សម្តេចតេជោ ហ៊ុន សែន នាយករដ្ឋមន្តី្រ ជាប្រធានកិត្តិយស

២៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច ជាប្រធាន

៣៖ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ជាអនុប្រធាន៕